Алматы облыстық ҰҚКД экс-басшысы қаңтар оқиғасы бойынша 6 жылға сотталды 

Алматы облыстық ҰҚК департаментінің бұрынғы басшысына қаңтар оқиғасында жұмыс орнын тастап кеткені үшін алты жылға бас бостандығына айыру жазасы тағайындалды.

Талдықорған қалалық сотында лауазымды адамның өз құқықтары мен өкілеттіктерінен тыс және ауыр зардаптарға әкеліп соққан билік пен лауазымдық өкілеттіктерді асыра пайдалану дерегі бойынша К-ге қатысты іс қаралды.

«Сот барысында анықталғандай, К. Алматы облысы ҰҚКД бастығы бола тұра, өзінің лауазымдық өкілеттігін асыра пайдаланып, 2022 жылғы 5 қаңтарда орын алған оқиғалар кезінде өзінің лауазымдық міндеттерін ескермей, жеке құрамға департамент ғимаратын қорғау жөнінде шаралар қолданбауға; әкімшілік ғимараттан кетуге; қызметтік және құпия құжаттаманы жоюға және тұрғылықты жерлеріне тарауға заңсыз бұйрық берген. Нәтижесі ҰҚКД ғимаратын басып алуға әкеліп соқтырды («құпия» деген белгіге байланысты басқа мән-жайларды жария ету мүмкін емес)» деп жазылған Талдықорған қалалық соты баспасөз қызметінің хабарламасында.

Сот үкімімен К. 362-баптың 4-бөлігі бойынша кінәлі деп танылып отыр. Оны 10 жыл мерзімге құқық қорғау органдарында белгілі бір лауазымдарды атқару құқығынан айыра отырып, 6 жылға бас бостандығынан айыру жазасы тағайындалғаны да нақтыланған.

Президентке К.-ге қатысты Ұлттық қауіпсіздік генерал-майоры арнаулы атағынан және мемлекеттік наградалар мен ордендерден айыру туралы ұсыныс енгізілді. Алайда сот үкімі әзірге заңды күшіне енген жоқ.