Әлем чемпионаты – 2026: Турнирдің үздіктері анықталды

2026 жылғы футболдан әлем чемпионатының қорытындысы бойынша турнирдің үздік ойыншылары марапатталды, деп хабарлайды Orda.kz.

«Алтын доп» Испания құрамасының жартылай қорғаушысы Родриге табысталды. Ол ұлттық құраманың әлем чемпионы атануына елеулі үлес қосқан негізгі ойыншылардың бірі болды.

«Алтын қолғап» жүлдесін Испания құрамасының қақпашысы Унай Симон иеленді. Ол турнир барысында сегіз матч өткізіп, соның жетеуінде қақпасына гол жіберген жоқ. Барлығы бір ғана гол өткізіп, әлем чемпионаттары тарихындағы ең ұзақ «құрғақ» серияның жаңа рекордын орнатты — 649 минут.

Үздік жас ойыншы атағы Испания құрамасының 19 жастағы қорғаушысы Пау Кубарсиге берілді. Ол сегіз матчтың барлығын толық өткізіп, турнирдің басты жаңалықтарының біріне айналды және Испанияның чемпион атануына үлкен үлес қосты.

«Алтын бутса» Франция құрамасының шабуылшысы Килиан Мбаппеге бұйырды. Ол сегіз матчта 10 гол соғып, турнирдің үздік сұрмергені атанды. Сонымен қатар Мбаппе әлем чемпионаттарында бұл марапатты қатарынан екі рет жеңіп алған тарихтағы алғашқы футболшы болды.

Оқи отырыңыз:

• Месси мен Роналду дәуірі аяқталды: 2026 жылғы әлем чемпионаты несімен есте қалды?
• Қазақстан мұнайы тиелген екі танкерге шабуыл жасалды: Министрліктер не дейді?