Албанияда ұсталған қазақстандық экстрадицияланды: ҰБТ-ға «кепілдікпен түсіремін» деп 28 млн теңге алған

Бірнеше рет алаяқтық жасады деген күдікке ілінген Қазақстан азаматы Албаниядан елге экстрадицияланды. Ол Ұлттық бірыңғай тестілеуге дайындаймын және жоғары оқу орнына кепілдікпен түсіремін деп ондаған адамды алдаған, деп хабарлайды Orda.kz.

Қазақстан Бас прокуратурасының мәліметінше, күдіктіні елге қайтару операциясын Бас прокуратура, Ішкі істер министрлігінің Интерпол Ұлттық орталық бюросы және Қазақстанның Албаниядағы елшілігі бірлесіп ұйымдастырған.

Тергеу нұсқасына сәйкес, 2022–2023 жылдары күдікті интернет арқылы жоғары сынып оқушыларын ҰБТ-ға дайындау және жоғары оқу орындарына кепілді түрде оқуға түсіру қызметін ұсынып, жалған ақпарат таратқан.

Осы схема арқылы кемінде 32 азамат алданып, жалпы сомасы 28 миллион теңгеден астам қаржысынан айырылған.

Қылмыс жасалғаннан кейін күдікті Қазақстаннан қашып кеткен. Кейін оған халықаралық іздеу жарияланды. 2025 жылдың мамыр айында ол Албания Республикасында ұсталып, Қазақстан Бас прокуратурасының сұрау салуы негізінде экстрадицияланды.

Қазір күдікті тергеу изоляторына қамалды. Егер кінәсі сотта дәлелденсе, оған мүлкі тәркіленіп, үш жылдан он жылға дейін бас бостандығынан айыру жазасы тағайындалуы мүмкін.

Оқи отырыңыз: 

ӘЧ-2026: Месси, Мбаппе және Роналду плей-офф кезеңінде бақ сынайды, шешуші кезең басталды

Энергетика министрлігі екі өңірде автогаз тапшылығы бар деген ақпаратты жоққа шығарды