«Алатау» жеңілдетілген бағдарламасы: Елімізде тағы бір 5 пайыздық ипотека іске қосылды

Алматы облысында бес пайыздық жеңілдетілген ипотекалық бағдарлама іске қосылды. Оған жұмыс істейтін Қазақстан азаматтары қатыса алады, деп хабарлайды Orda.kz.        

Несиенің қандай шарттармен берілетіні туралы толығырақ тоқталайық. Елімізде өңірлерге арналған бірқатар жеңілдетілген ипотекалық бағдарламалар жұмыс істейді. Мәселен, бұған дейін 35 жасқа дейінгі жұмыс істейтін қала жастарына арналған «Алматы жастары» бағдарламасы болды.

Енді Алматы облысында «Алатау» ипотекалық бағдарламасы іске қосылды. Жастарға арналған бағдарламалардан ерекшелігі оған 18 бен 60 жас аралығындағы азаматтар қатыса алады.

Биыл бағдарлама аясында 120-дан астам несие беру үшін 3,2 миллиард теңге бөлінді.

«Алатау» ипотекасының негізгі шарттары: жылдық мөлшерлеме бес пайыз, бастапқы жарна – 10 пайыз, несие сомасы  30 миллион теңгеге дейін. Бастысы пәтерді тек жаңа салынған тұрғын үйден және тек Қонаев қаласынан сатып алуға болады. Бағдарламаға жеке баспанасы жоқ азаматтар қатыса алады.

«Алатау» жеңілдетілген бағдарламасы мына салаларда жұмыс істейтін Қазақстан азаматтарына арналған. Оған білім беру, денсаулық сақтау, мәдениет, спорт, әлеуметтік сала, энергетика және коммуналдық шаруашылық,  мемлекеттік қызмет, бұқаралық ақпарат құралдары өкілдері қатыса алады. Бұл санат бағдарламаға 2026 жылы қосылды.

«Алатау» бағдарламасына қалай қатысу үшін өтініштер Қонаев қаласындағы «Шахнур» бизнес-орталығында қабылданады.

Құжаттар дүйсенбі-жұма – сағат 09:00-ден 18:00-ге дейін, сенбі – сағат 13:00-ге дейін қабылданады. Алдымен құжатты әкімдік тексереді. Одан кейін облыстық комиссия қарастырады. Қатысушылар арнайы балл жүйесі бойынша іріктеледі.

Ал балл келесі критерийлер бойынша беріледі: ресми некеде тұрғаны үшін – 2 балл,
кәмелетке толмаған балалары болғаны үшін – 2 балл,  әр келесі балаға тағы 1 баллдан қосылады, еңбек өтілі кемінде екі жыл болғаны үшін – 2 балл, әр келесі жылға тағы 1 баллдан,
мемлекеттік қызметте немесе бюджеттік салада жұмыс істегені үшін – 5 балл,  әлем чемпионы немесе Азия ойындарының чемпионы атағы үшін, оның ішінде паралимпиада спортшыларына 7 балл қосылады.

Байқауда жеңіске жеткендерге «Отбасы банкке» жолдама беріледі. Банкте олардың табысы мен несие тарихы тексеріледі. Егер табысы жеткіліксіз болса, екі кепілгерді тартуға мүмкіндік бар.

Оқи отырыңыз:

• Қазақстанда ипотека алу қиын әрі қымбат. Неге?
• Жаңа базалық мөлшерлеме халықты ипотекасыз қалдыру қаупін тудырды
• Отбасы банк жеңілдетілген ипотекаға кедергі болатын тұстарын алып тастады