Алаяқтардың құрбаны қатарында жастар мен зейнеткерлер көбейді

Биылғы және өткен жылдың сегіз айының қорытындысы бойынша Ішкі істер министрлігінің киберқылмыспен күрес департаменті интернет-алаяқтыққа қатысты талдау жүргізді. 2025 жылы зардап шеккендердің жасы айтарлықтай төмендеген, деп хабарлайды Orda.kz.

Егер өткен жылы жәбірленушілердің арасында 18 бен 30 жас аралығындағы азаматтар саны екі мыңға жуық болса, биыл бұл көрсеткіш үш мың адамға дейін өскен. Сондай-ақ, 60 жастан асқан азаматтар да тәуекел тобына кіріп отыр. Осылайша, киберқылмыскерлер үшін ең осал топ — жастар мен зейнет жасындағы адамдар.

«Мұндай қылмыстарда жиі қолданылатын тәсілдердің бірі — «дроптар»  деп аталатын азаматтарды пайдалану. Бұл дегеніміз, қарапайым тұрғындар әртүрлі себептермен өздерінің банк карталарын алаяқтарға беріп қояды. Сол карталар арқылы қылмыскерлер ұрланған қаражатты қолма-қол ақшаға айналдырады. Естеріңізге саламыз, 15 қыркүйектен бастап Қылмыстық кодекске өзгерістер күшіне енеді. Енді өз банк картасын үшінші тұлғаларға бергені үшін қылмыстық жауапкершілік қарастырылады. Ең жоғарғы жаза — жеті жылға дейін бас бостандығынан айыру», — деді Ішкі істер министрлігінің киберқылмыспен күрес департаменті басқарма бастығының орынбасары Әсет Жүкенов

 
Қазақстандықтар ақшаны депозитке емес, банк карталарында сақтағаны үшін қаражат жоғалтады. Ал банктер, керісінше, осы арқылы пайда табады.