Ақтөбеде оқушыны зорлады деп айыпталған ер адам 16 жылға сотталды

Ақтөбе соты 16 жастағы оқушы қызға азғындық жасаған, екі бірдей ауыр айып тағылған ер адамға үкім шығарды. Оқушыға жыныстық әрекет жасаған отбасылы жігіт сот залында жылап жіберді, деп хабарлайды Orda.kz. 

Ақтөбе облысының қылмыстық істер жөніндегі мамандандырылған ауданаралық сотында 25 жастағы жігітке үкім оқылды. Оқушы қызға жұмыс орнында зорлық көрсеткер ер адам 16 жылға бас бостандығынан айырылды. Ол жазаны қауіпсіздігі орташа режимдегі түрмеде өтейді. 

Іс бойынша сот отырысы жабық өтті. Сондықтан сотталушының жұмыс орны айтылмады. Жәбірленуші оқушының сотталушының жұмыс орнына қалай барғаны да жарияланған жоқ. Заңға сай үкімді оқу ашық түрде өтті. 

Іс материалдарында оқушы қызға жасалған азғындық қылмыстық кодекстің «зорлау» және «жыныстық сипаттағы зорлық-зомбылық әрекеттері»  баптары бойынша қаралғаны айтылды. 

Оған педагогика саласында, кәмелетке толмағандарға қатысты қызметте жұмыс істеу құқығынан өмір бойына айыру үкімі шықты.

Сонымен қатар, сотталушыға жәбірленушінің пайдасына 2 млн теңге моральдық залал өндіруді міндеттеді. Сот тергеу кезінде заттай дәлел ретінде сақталған іш киім, юбка, қара сөмке, аяқ киім, футболка, қалпақ, капрон секілді жеке заттарды жоюды тапсырды. Сотталушының туыстары үкімге апелляциялық шағым түсіретінін айтты.

Автор: Ардақ Ерубаева