Майқайыңдағы іздеу жұмыстары тоқтатылуы мүмкін - ТЖД

Майқайыңда құтқарушылардың өміріне қауіп төнгендіктен автобусты іздеу жұмыстары тоқтатылуы мүмкін деп хабарлайды Orda.kz Төтенше жағдайлар министрлігі таратқан мәлімдемеге сүйеніп.

Төтенше жағдайлар министрлігі Майқайыңалтын аумағында опырылған жердің аумағы бойынша жарықтар пайда болып, бұл шахтада іздеу жұмыстарын жүргізіп жатқан құтқарушылардың өміріне қауіп төндіріп тұрғанын мәлімдеді.

Ведомство «Азаматтық қорғау туралы» ҚР Заңына сәйкес, авариялық-құтқару жұмыстарын жүргізу мүмкін болмаған жағдайда, олар тоқтатылуы мүмкін екенін айтты.

Төтенше жағдайлар министрлігі таратқан хабарламада мұндай жағдайда бірінші кезекте төтенше жағдай аймағындағы адамдарды құтқару үшін барлық мүмкін шараларды қабылдау керектігі айтылған.

 Осыған байланысты жұмысты тоқтату мәселесі қарастырылуда.

«Шахтадағы топырақ жағдайы өте қауіпті. Бұрын кішірек жарықтар пайда болған кездің өзінде жар құлаған. Оның үстіне GRP Ridder group мамандары топырақты магнитометрмен және геосканермен зерттеген кезде іздестіру орнындағы опырылулар мен құлаулар ықтималдығы жоғары деген қорытындыға келді» деп хабарлады Төтенше жағдайлар министрлігі.

Тау-кен жұмыстары кезінде топырақ қазылатын болғандықтан,  оның адамдарды басып қалу қаупі жоғарылаған.

«Сонымен қатар жұмысты төменгі температура мен күшті қарлы боран қиындатты. Мұның барлығы құтқарушылар өміріне қауіп төндіреді» делінген хабарламада. 

Бұған дейін Orda.kz іздестіру орнында автобус бөліктері мен құтқарушылардың жеке заттары табылып, жер бетіне шығарылғанын жазған болатын. Естеріңізге сала кетейік, 4 қаңтарда құтқарушылар мінген автобус Майқайыңалтын тау-кен учаскесіндегі қазылған орынға құлап кетті. Көп ұзамай олардың екеуінің денесі табылды. Тағы екі адам мен автобусты іздеу күні бүгінге дейін жалғасуда.