Ақтөбеде «блогермін» деп бірнеше адамды алдаған қоғамдық кеңестің мүшесі сотталды

Ақтөбеде «блогермін» деп бірнеше адамды алдаған қоғамдық кеңестің мүшесі сотталды. Мемлекеттік сатып алу кезінде жеңіп шығуға уәде еткен қоғамдық кеңес мүшесі сотта жеңіл жазамен құтылды. 35 жастағы тұрғын сотта жерлестерінен алдап, ақша алғанын мойындады, деп хабарлайды Orda.kz.

Мұғалжар аудандық соты әкімдік жиынына қатысып жүрген қоғамдық кеңес мүшесіне айыптау үкімін оқыды. Сот үкіммен​ «Алаяқтық» бабымен айыпталған 35 жастағы сотталушыға 3 жыл бас бостандығынан шектеу жазасы тағайындалды.

«Сотталушы ҚК-нің 190-бабы 3-бөлігі 4-тармағымен айыпталады.  Оған 3 жыл мерзімге бас бостандығынан шектеу жазасы тағайындалды», деп мәлімдеді сот. 

Мұғалжар ауданының әкімі Дархан Ермағанбетов сотталушының биыл наурыз айынан бастап қоғамдық кеңеске мүше болғанын растады.

Іс материалдарына сүйенсек, 2023 жылдың тамыз айында А. есімді сотталушы Қандыағаштағы азық-түлік дүкенінің иесіне өзін қоғам белсендісі ретінде таныстырады. Алкоголь өнімдерін сағат 23:00-ден кейін де сатуды шешіп беремін деп алдап, одан 1 млн теңге алған. 

Кейін көлік жуу қызметінің иесіне жүргізуші куәлігін қайта қалпына келтіруге көмектесетінін айтып, 257 мың теңге алады. Тағы бір жерлесін жұмысқа тұрғызамын деп сендіріп, 450 мың теңге алған.
Сондай-ақ мердігерге Қандыағаш қаласында орналасқан саябақ пен ескерткішті күтіп ұстау жұмысы бойынша мемлекеттік сатып алу кезінде жеңіп шығуға көмектесетінін айтып, уәде еткен. Байқау құжаты талапқа сай келмейтін кәсіпкерден реттеп беремін деп 1 млн теңге алған.

Сотталушы кінәсін мойындады. Жәбірленушілерге келтірілген материалдық залал толығымен өтеді.
Прокурор соттан сотталушы 3 жыл және 6 ай мерзімге бас бостандығынан шектеу жазасын тағайындауды сұрады.

Айта кетейік, осыған дейін Қандыағаш қаласындағы 273 млн теңге бөлінген саябақтың 5 жыл бойы салынғанын жаздық. Демалыс орны әлі де қаңырап тұр, кемшіліктер жойылмаған. 
Сонымен қатар, Мұғалжар аудандық мәслихат депутаты 672 млн теңге жымқырды деген күдікпен қамауға алынды. Іс тергеліп жатыр.

Еске сала кетсек, Ақтөбе облысындағы Шалқар қаласында тағы бір әкімдік қызметкері «пара алу» бабымен сот алдына келді. Тергеу кезінде қылмыстық іс бойынша аудан әкімінен жауап алынған. Енді мердігерді қорқытып пара алған шенді әкімді сотқа шақыруды сұрап жатыр.