Ақтөбеде әскерден келген жігіт оқушымен жыныстық қатынасқа түсті

Ақтөбеде әскерден келген 20 жастағы жігіт 10 сынып оқушысымен жыныстық қатынасқа түсті деген күдікке ілінді, деп хабарлайды Orda.kz.

Оқиға оқушы қыздың үйінде болған. Ақтөбе облысы ауылдарының бірінде жас жігіт оқушы қызға жыныстық сипаттағы әрекеттер жасаған.

Ақпаратты аудандық білім бөлімі растады.

Оқиға 20 қыркүйек күні кешкі уақытта болған. Қазір тергеу, анықтау жұмыстары жүріп жатыр. 

«Зорлау емес. Бала қазір үйінде. Қасында мектеп психологтары мен анасы бар. Толыққанды отбасынан. Өздерінің айтуынша, жүріп жүрген жігіті келген. Үйінде болған жағдай. Қыз бала осыған дейін мектепішілік есепке алынған. Психологтар зерделеу жасағанда өз жасынан үлкендеу әрекеті болған соң қыздармен жұмысты күшейтіп, ата-анамен сөйлесті, есепке алды»,  деп хабарлады аудандық білім бөлімі. 

Полиция оқиғаға қатысты ҚК-тің 122-бабы1-бөлігі бойынша іс қозғады. «Көрінеу 16 жасқа толмаған адаммен жыныстық қатынас немесе жыныстық сипаттағы өзге де әрекеттерді жасау» бойынша тергеу жүріп жатыр.

«Кәмелетке толмаған балаға қатысты жыныстық сипаттағы әрекет фактісі бойынша күдікті анықталып, полиция бөліміне жеткізілді. Аталған дерек бойынша қылмыстық іс қозғалды. Оқиғаның мән-жайлары толық анықталып жатыр.
Қылмыстық іс бойынша тергеп-тексеру амалдары жүргізіліп жатқандықтан, өзге ақпарат жария етілмейді»,  деп хабарлады Ақтөбе облысы ПД-нің баспасөз қызметі. 

Автор: Ардақ Ерубаева