Ақтөбеде әлем чемпионы атанған жас балуанға көлік сыйға тартылды

Ақтөбеге Словакияда өткен 20 жасқа дейінгі жасөспірімдер арасындағы әлем чемпионатында алтын медаль жеңіп алған балуан Қазыбек Қалмағамбетов оралып, оған әкімдік су жаңа көліктің кілтін табыс етті, деп хабарлайды Orda.kz облыс әкімдігіне сілтеп.

Әлия Молдағұлова атындағы халықаралық әуежайда 67 келіге дейінгі салмақта әлем чемпионы атанған спортшыны ата-анасы, туған-туыстары және жүздеген жерлесі қарсы алды.

Іс-шарада облыстық туризм, дене шынықтыру және спорт басқармасының басшысы Мейрамбек Махамбетов сөз сөйледі.

Ақтөбе облысының әкімі Асхат Шахаровтың ұсынысымен ол тарихи жеңіспен елге оралған спортшыға автокөліктің кілтін табыстады.

Айта кетейік, Қазыбек Қалмағамбетов – Ақтөбе облысының тарихында грек-рим күресінен 20 жасқа дейінгі санатта әлем чемпионы атанған тұңғыш спортшы. Балуан 67 келіге дейінгі салмақта финалға дейін төрт қарсыласын жеңіп шықты.

Шешуші белдесуде оның қарсыласы Беларусь спортшысы Михаил Марковский болды. Кездесу 13:7 есебімен қазақстандық балуанның пайдасына аяқталды.

Сөйтіп, 19 жастағы Қазыбек Қалмағамбетов 20 жасқа дейінгі спортшылар арасында әлем чемпионы атанды.

Оқи отырыңыз:

• Алматыда мопед жүргізушісі коммуналдық қызмет көлігінің астында қалып қаза тапты
• ҰҚК 5 млн теңгемен әкімдік алдында ұстаған экс-шенеунік сот залында қамауға алынды