Ақтауға Embraer өндірушісі мен Бразилияның CENIPA орталығының мамандары келеді

Оқиға орнында Әзірбайжанның авиациялық билік өкілдері мен AzAl авиакомпаниясының өкілдері жұмыс істеп жатыр, деп хабарлайды Orda.kz.

Көлік министрлігінің мәліметінше, Ақтаудағы әуе апатын тергеу үшін министрліктің өзінде комиссия құрылды. Бұл «Азаматтық және тәжірибелік авиациядағы авиациялық оқиғалар мен инциденттер туралы мәліметтерді беру және тергеу ережелеріне» сәйкес қажет екені айтылды.

«Көлік саласындағы оқиғалар мен инциденттерді тергеу департаментінің қызметкерлері авиациялық оқиға орнына келіп, тергеудің даладағы кезеңін жүргізуде»,  деп хабарлады ведомство.

Сонымен қатар, Ақтауға Әзірбайжанның азаматтық авиация мемлекеттік агенттігі мен Azerbaijan Airlines авиакомпаниясы өкілдері де жетті.

«Қазақстанға ұшақ өндірушісі Embraer және Бразилияның әуе апаттарын тергеу және алдын алу орталығының (CENIPA) өкілдері де ұшып келеді», — деп қосып өтті көлік министрлігі.

Кеше Ақтауда вице-премьер Қанат Бозымбаевтың төрағалығымен үкіметтік комиссия жұмыс істей бастады. Оның мүшелері оқиға орнында болып, кейін зардап шеккендермен кездесті.

25 желтоқсанда Бакуден Грозныйға ұшып шыққан Azerbaijan Airlines авиакомпаниясының Embraer-190 ұшағы Ақтауда апатқа ұшырады. Әуе апатында 38 адам қаза тапты, 29 адам аман қалып, ауруханаға жеткізілді.