«Ақтаудағы ауыз су жанжалы»: Маңғыстау облысы әкімдігі мәселені қалай шешетіндерін айтты

Маңғыстау облысында «Каспий» тұщы су өндіру зауытының қуаттылығын екі есе арттыруға арналған ауқымды жоба басталды.

 Бұл туралы Маңғыстау облысы әкімдігінің баспасөз қызметі хабарлады.

Ақтауда жыл сайын жаз айларында су тапшылығы, құбырлардың жиі жарылуы сынды қиындықтар туып, дау-жанжал болып жатады. Тіпті қала тұрғындары облыс әкімдігі қызметкерлерін су мәселесін шешпеді, мемлекеттік басшының тапсырмасын орындамады деп, жауапқа тартуды талап еткен петиция жасады.

«Мәселені шешу мақсатында үкімет «Каспий» зауытын тәулігіне 20 мың текше метрден 40 мың текше метрге дейін кеңейту жобасын іске қосты. 25 шілдеде қуаттылығы 5 мың текше метр болатын бірінші қондырғы іске қосылды. Қалған төрт қондырғы тамыздың соңына дейін пайдалануға беріледі. Күзге дейін зауыттың қуаттылығы екі есе ұлғайтылып, өңірге қосымша 40 мың текше метр су берілетін болады» деп мәлімдеді әкімдік өкілдері.

Сонымен қатар, тұщы су көлемін арттыру мақсатында ТОО «МАЭК» аумағында жаңа тұщы су өндіру қондырғысы іске қосылды. ТОО «СК-А-Строй» өзінің қондырғысының қуатын 5 мың текше метрден 9 мың текше метрге дейін ұлғайтатындарын айтты.

Еске сала кетейік, Orda.kz  Ақтауда ауыз сусыз отырғандардың көшеге шығып, жолды жауып тастағанын жазған болатын.