Ақтауда ауыз сусыз отырғандар көшеге шығып, жолды жауып тастады

Ақтаудағы 19-ықшамаудандағы 43-үйдің тұрғындары үш күннен бері ауыз сусыз қалыпты. Осы қиындыққа ел назарын аудару үшін олар жолды жауып тастады. Оқиға орнына дереу полиция келді.

Бұл туралы Lada.kz хабарлады. 

Маңғыстау облыстық полиция басқармасының қызметкерлері жолды босатып, тұрғындарды жол жиегіне шығуды сұрады. Көлік қозғалысы қалпына келтірілді.

Ал наразы жұрттың алдына қала әкімі Ұлықбек Тналиев пен ҚЖСА басшысы келді.

«Қала әкімі, Ақтау қалалық тұрғын үй инспекциясы бөлімінің жауаптылары, Ақтау қалалық тұрғын үй-коммуналдық шаруашылық бөлімі және «Каспий Жылу, Су арнасы» МКҚК басшылығы тұрғындармен сөйлесіп, мәселенің мән-жайын түсіндірді. «Каспий Жылу, Су арнасы» коммуналдық кәсіпорны ЦУВС-4 мекемесінде ауыз су көп тұтынылған соң суды жіберетін қысым кешкі 19:00-ге дейін басылғанын тұрғындарға жеткізді. Тұрғындар мән-жайды естіген соң, үйді-үйіне тарқасты» деп мәлімдеді қалалық әкімдіктің баспасөз қызметі.