Ақтауда бір жарым жасар баланы полиция қызметкері қағып кетті

Қайғылы оқиға 13 мамыр күні облыс орталығының 27-шағынауданында болды. Жол талғамайтын көлік кәмелетке толмаған баланы қағып кеткен, салдарынан сәби оқиға орнында қаза тапты, деп хабарлайды Orda.kz.

Маңғыстау облыстық полиция департаментінің мәліметінше, қызметтік көліктің тізгінінде құқық қорғау органы қызметкері болған. Ол 27-шағынаудандағы тұрғын үйдің алдындағы автожолда бір жарым жастағы ұл баланы қағып кеткен. Оқиға салдарынан сәби есін жимастан сол жерде көз жұмған.

Аталған факт бойынша ҚР Қылмыстық кодексінің 345-бабы 3-бөлігі («Көлік құралдарын басқаратын адамдардың жол қозғалысы немесе көлік құралдарын пайдалану қағидаларын бұзуы») бойынша қылмыстық іс қозғалды. Жүргізуші уақытша ұстау изоляторына қамалды. Қазіргі таңда қажетті тергеу амалдары жүргізіліп жатыр. Маңғыстау облыстық полиция департаменті қаза тапқан баланың туыстары мен жақындарына көңіл айтты, деп хабарлады полиция.

Ведомство мәліметінше, бұл оқиға департамент басшылығының ерекше бақылауына алынған.

Басылымға бейресми дереккөздің хабарлауынша, жүргізуші алкогольдік және наркологиялық сараптамадан өткен. Нәтижесінде оның алкоголь немесе психотроптық зат қолданбағаны анықталған.

Оқи отырыңыз:  

• Санжар Боқаев 18 маусымға дейін қамауда қалады
• Алаяқ азаматтарға жүргізуші куәлігін алып беремін деп уәде беріп, алдаған