АҚШ-тың арағайындығымен Израиль мен Ливан арасында алғаш рет келіссөз жүріп жатыр

Ливан мен Израиль 30 жылдан астам уақыттан кейін АҚШ-тың арағайындығымен тікелей келіссөздер жүргізе бастады. Келіссөз Вашингтон қаласында өтіп жатыр, деп хабарлайды Orda.kz  BBC-ге сілтеме жасап.

Келіссөздердің басталуына қарамастан, Израиль Ливанның оңтүстігінде әскери операциясын жалғастырып жатыр. Бұл әрекеттер Хезболла содырларына қарсы бағытталған.

АҚШ мемлекеттік департаменті ғимаратында Ливан атынан АҚШ-тағы елшісі Нада Хамаде, ал Израиль атынан елші Йехиэль Лейтер кездесті.

Ал Дональд Трамп әкімшілігі атынан мемлекеттік хатшы Марко Рубио мен АҚШ-тың Ливандағы елшісі Мишель Исса, кеңесші Майкл Нидхэм және БҰҰ-дағы арнайы өкіл Майк Уолц қатысты.

Кездесу алдында шенеуніктер қысқа уақытқа фотоға түсіп, кейін келіссөздерді жабық форматта жалғастырды.

Марко Рубио бұл келіссөздерден үлкен нәтиже күтпеуге шақырып, оның тек «процестің басталуы» екенін айтты.

Айта кетейік, 2 наурыз күні «Хезболла» жасаған шекара маңындағы шабуылдан кейін Израиль әскері 2024 жылғы қарашада күшіне енген атысты тоқтату келісіміне қарамастан, Ливан аумағындағы әуе және құрлықтағы әскери операцияларын кеңейтті.

Ливан денсаулық сақтау органдарының мәліметінше, Израиль шабуылдары салдарынан кемінде 2089 адам қаза тауып, 6762 адам жараланған.

Оқи отырыңыз: 

• Израиль мен Ливан атысты тоқтату жөніндегі келіссөз күнін белгіледі
• АҚШ пен Иран келіссөздерді уақытша тоқтатты: Бітімгерлік келісім аяқсыз қалды
• Бітім қыл үстінде: Израиль соққыларынан кейін Иран Ормуз бұғазын қайта жапты