АҚШ пен Ресей Украинадағы соғысқа қатысты құпия жоспар дайындап жатыр

АҚШ пен Ресей билігі Украинадағы соғысты тоқтату үшін жасырын түрде ауқымды жоспар құрып жатыр, деп хабарлайды Orda.kz. 

Келіссөздер өте қатаң ережемен, құпия жүргізіліп жатыр. 28 тармақтан тұратын жоспар төрт бағытты қамтиды: Украинадағы соғысты тоқтату, қауіпсіздік кепілдіктері, Еуропадағы тұрақтылықты нығайту және АҚШ-тың Ресеймен және Киевпен болашақ қатынастарын орнату.

Құжатты дайындауға АҚШ президентінің арнайы өкілі Стивен Уиткофф белсенді атсалысып отыр. Қазан айында ол Майамиде Кремль өкілі Кирилл Дмитриевпен үш күндік келіссөздер жүргізген еді. 

Бұған дейін Ресей Федерациясы президентінің арнайы өкілі Уиткоффпен үш күндік нәтижелі кездесулердің бейбітшілік, сауда, экономикалық ынтымақтастыққа әсері болғанын айтқан еді. 

Кейінірек бұқаралық ақпарат құралдарында жоспардың егжей-тегжейі пайда болды. Financial Times анонимді дереккөздерге сілтеме жасай отырып, келіссөз барысындағы ұсынысқа мыналар жататынын жариялады: 

• Донбасстың қалған бөлігін тапсыру және Украина әскерін екі есе қысқарту;
• Орыс тіліне ресми мәртебе беру;
• Мәскеу Патриархатының православие шіркеуін мойындау;
• Америкалық әскери көмекті азайту;
• Шетелдік әскерлерді орналастыруға тыйым салу.

Айта кетейік, 19 қарашада Украина басшысы Түркияға «келіссөздерді жандандыру» үшін барды. Анкарада Зеленскиймен кездесу қорытындысы бойынша Ердоған елдерді келіссөздер үстеліне қайта отыруға шақырды.

Еске салайық, кеше ғана Ресей әскери күштері Тернопольдегі үйлерге оқ жаудырды. Украинаның ТЖМ таратқан соңғы мәлімет бойынша 19 адам қаза тауып, 66 адам зардап шекті.