АҚШ Қорғаныс министрі Қытайдың Тайваньға басып кіруіне дайын болуға шақырды

Қытайдың Тайваньға әскермен басып кіруі «мүмкін болмай қоймайтын» оқиға болуы ықтимал. Сондықтан АҚШ-тың Үнді-Тынық мұхиты аймағындағы одақтастары қорғанысқа бөлінетін шығындарын арттыруы қажет. Бұл туралы АҚШ Қорғаныс министрі Пит Хегсет Сингапурдегі қорғаныс форумында мәлімдеді, деп хабарлайды Orda.kz Financial Times-қа сілтеме жасап.

Оның айтуынша, Қытайдың Тайваньды жаулап алуға ұмтылуы Үнді-Тынық мұхиты аймағы мен бүкіл әлемді «қасіретті салдарға»  әкеледі. Хегсеттің сөзінше, Пекин Азияда үстем болуды көздеп отыр және соған сай әрекет етуде. Сондықтан бұл жағдай «шұғыл дабыл» ретінде қаралуы керек.

«Мұны жұмсартып айтуға себеп жоқ. Қытайдың төндіріп тұрған қаупі нақты және бұл — болмай қоймайтын қауіп болуы мүмкін. Біз олай болмайды деп үміттенеміз, бірақ бұл шындыққа айналуы әбден мүмкін», — деді Хегсет. 

Хегсеттің айтуынша, Үнді -Тынық мұхиты аймағы Трамп әкімшілігі үшін басым бағыт болып қалады.

«Си Цзиньпин әскеріне 2027 жылға дейін Тайваньға басып кіруге дайын болуды бұйырды. Пекин бұл үшін қажетті әскер жинап, күн сайын жаттығып, шынайы соғысқа әзірленіп жатыр», — деп қосты министр. 

Вашингтон бұл өңірдің ығыстырылуына жол бермейді және өзінің одақтастары мен серіктестерін «жаулап алуға, бағындыруға, қорқытуға» қарсы тұрады.

«Біз  соғыстың алдын алу және бейбітшілікке күш арқылы қол жеткізу үшін соғысқа дайындалып жатырмыз», — деп мәлімдеді Пентагон басшысы. 

Сонымен қатар Қорғаныс министрі АҚШ Қытаймен қақтығыс іздеп отырмағанын атап өтті. Хегсеттің айтуынша, Трамп та, америкалықтар да бұл елге құрметпен қарайды.

Пит Хегсет Еуропа елдерінің де Үнді -Тынық мұхиты аймағындағы қатысуын арттырғанын қалайтынын жеткізді. Бұл Қытайды тежеу үшін «тиімді болар еді». Алайда ол алдымен еуропалықтар өз континенттерінің қауіпсіздігіне мән беруі қажет екенін атап өтті.

Былтырға қазан айында Қытай басшысы Си Цзиньпин Қытай армиясын «соғысқа дайындықты жан-жақты күшейтуге және әскерлердің сенімді жауынгерлік әзірлігін қамтамасыз етуге» шақырған болатын.

2022 жылдың қыркүйегінде АҚШ президенті Джо Байден Қытай басып алған жағдайда АҚШ әскерлері Тайваньды қорғайтынын айтты.