АҚШ Иранға ядролық қызметті 20 жылға «тоқтата тұруды» ұсынған — The New York Times

The New York Times басылымының жазуынша, АҚШ Иранға ядролық бағдарламаны толық тоқтатуды емес, 20 жылға уақытша «тоқтата тұру» нұсқасын ұсынған. Бұл ұсыныс Тегеранға уран байыту құқығынан біржола бас тартпауға мүмкіндік береді, деп хабарлайды Orda.kz Meduza-ға сілтеме жасап. 

Алайда дереккөздердің мәліметінше, Иран бұл мерзімді небәрі 5 жылға қысқартуды талап еткен. Осындай ұсыныс АҚШ пен Иран арасындағы ақпанда Женевада өткен келіссөздерде де талқыланған. Дәл осы келіспеушілік Дональд Трамп әкімшілігінің әскери жағдайға көшуіне себептердің бірі болған. Бұл туралы he New York Times мәлімдеді.

Ал Дональд Трамп әлеуметтік желіде The New York Times басылымын сынға алып, оның ақпараттарын «жалған жаңалық» деп атады.

Интерфакс дерегінше, Иран ресми жауабында ядролық бағдарламаны тоқтата тұру мерзімін 5 жылға дейін қысқартуға келісетінін білдірген. Алайда Дональд Трамп бұл ұсынысты қабылдамаған.

АҚШ тарабы Ираннан жоғары деңгейде байытылған уранды елден шығаруды талап еткен. Ал Иран керісінше, ядролық отын ел ішінде қалуы тиіс деп есептейді. Соған қарамастан, олар оны қару жасауға жарамсыз ету үшін айтарлықтай сұйылтуды ұсынған.

Bloomberg дерегінше, тараптар тағы бір рет бетпе-бет келіссөз өткізу мүмкіндігін де қарастырып жатыр. Бірақ нақты жоспарлар әзірге бекітілмеген.

Бұған дейін бірқатар БАҚ АҚШ пен Иран ұзақ мерзімді бітімге келу үшін жаңа келіссөздер тізбегін талқылап жатқанын хабарлаған.

Кездесуді қайтадан Исламабад қаласында өткізу нұсқасы қарастырылып жатыр. Сонымен қатар, Түркия немесе Египет аумағында ұйымдастыру мүмкіндігі де талқылануда.

Оқи отырыңыз:

• Иранда өлім жазасына кесілгендер саны күрт артты
• Иранның Ормуз бұғазын аша алмау «себебі» белгілі болды