Ақнәрдің анасына кім қысым көрсетті?

Алматыда жетінші қабаттан құлап қаза тапқан Ақнәр Гүлістанның анасы Гүлістан Хамит тергеу барысында өзіне полиция тарапынан қысым жасалғанын мәлімдеді, деп хабарлайды Orda.kz.

Бұл туралы justice_for_aqnar Instagram парақшасында Ақнәрдің анасы Гүлістан Хамит жазба жариялады.

Оның айтуынша, Алматы аудандық полиция бөлімінің қызметкерлері хабарласып, үйіне полицейлерді жіберетінін айтып, одан қандай да бір бейнежазбаны беруді талап еткен. Алайда Гүлістан Хамит қолындағы барлық бейнематериалдарды тергеушіге бұрын тапсырғанын айтады. Қазір одан нақты не талап етіліп отырғаны мүлде түсініксіз.

«Қызы азапталып, қаза тапқан жәбірленуші тарапқа қысым көрсету — барып тұрған сұмдық. Қылмыскерлерге қатысты әділ әрі заңды шешім қабылдаудың орнына, тергеу бағытын басқа арнаға бұру кімге тиімді? Біз бұл әрекетті жәбірленушіні қорқытып-үркіту және әділдікке жетуге кедергі келтіру деп бағалаймыз» деп жазылған парақшадағы жазбада.

Еске салайық, бұған дейін Гүлістан Хамит баспасөз мәслихатын өткізіп, қызының өз еркімен секірмегенін, жанында болған екі құрбысының бірімен жанжал болғанын айтқан. Сонымен қатар, өткен аптада сол қыздардың бірі — Дидар Мұқияттың адвокаты Жандос Палманов журналистерге Дидардың Ақнәрдің өліміне қатысы жоғын айтып, іске қатысты өз ұстанымын білдірген болатын.