«Ақнәр Гүлістанды зорламақ болды»: Іске қатысты тың деректер шықты

Былтыр Алматыда тұрғын үйдің жетінші қабатынан құлап қаза болған Ақнәр Гүлістанның анасы мен оның адвокаты Инга Иманбай қайта баспасөз мәслихатын өткізіп оқиғаға дейін бір ер адам  қызына жыныстық іс-әрекеттер жасап, қысым көрсеткенін айтты, деп хабарлайды Orda.kz. 

Гүлістан Хамит Дидар Мұқияттың қорғау тарапы өздерін ақтау үшін бейнежазбаның өздеріне керек тұстарын ғана көрсеткенін айтты. Оның айтуынша, Ақнәрға қатысты өткен жылдың сәуірінде түсірілген бейнежазбалар жайлы қызы тірі кезде білмеген. Дидар Мұқият бұған дейін де Ақнәрдің туыстарына неше түрлі хабарламалар жіберіп, «Ақнәр өлейін деп жатыр», деген сөздер айтқан екен. 

«Мен өткен жылдың 13 сәуірінде түсірілген бейнежазбадан мүлде хабарым болмады. Оның барлығын өлген соң ғана маған сіңілім айтты. Ол түсірілген бейнежазбаны менің сіңілме жіберген екен. Сол жерде анық байқалып тұр  олар қызымды еркінен тыс ұстаған, телефонын әрі сөмкесін бермей қойған», – деді Гүлістан Хамит.

Қорғаушы Инга Иманбай 2024 жылдың 12 сәуірінде Ақнәрға қатысты жаңа жайт анықталғанын хабарлады. Оның айтуынша, сол күні бір азамат қызды пәтерде заңсыз ұстап, оған психологиялық және жыныстық зорлық көрсеткен. Бұл жағдайды бейнежазбаға Дидар Мұқият түсірген. Иманбай бұл жазбаны тергеуге тапсырып, оның негізінде қылмыстық кодекстің бірнеше бабы бойынша сараптама жүргізуді сұрайтынын айтты.

«Бейнежазбада Ақнәрдің пәтерден кеткісі келгені, бірақ оған мүмкіндік берілмегені көрініп тұр. Оны күшпен ұстап, келісімінсіз денесіне, оның ішінде интимді жерлеріне қол тигізген. Сонымен қатар, терезені ашып «секір» деген сөздер арқылы психологиялық қысым жасалған. Ауыр сөздермен ар-намысы тапталған, ал жеке заттарын, телефоны мен сөмкесін бермей қойған», – деді заңгер. 

Сондай-ақ, Иманбай Ақнәр қайтыс болған түні сағат үштер шамасында қос қыздың да қорғаушысы болғанын олардың оқиға орнына келгенін айтты. Оның айтуынша, бұл да көптеген сұрақ туғызады.

Баспасөз мәслихатында марқұмның анасы мен заңгер қылмыстың алдын ала жоспарланып, әдейі жасалғанын дәлелдейтін жаңа деректерді жария етті. Олардың айтуынша, бейнежазбаларда көрінетін белгісіз ер адам екі қыздың сыбайласы болуы мүмкін. Бұл азаматтың есімі — Ұлбақ. Дидар Мұқияттың адвокаты Жандос Палмановтың айтуынша, ол Мұқияттың інісі. Марқұмның анасы дәл осы жігіттің де қылмысқа қатысы бар деп күдіктенетінін мәлімдеді. 

Бұған дейін күдікті қыздардың қорғаушылары Ақнәр Гүлістан ішімдік ішіп алған соң өзін қалай болса солай ұстағанын, ал олар оны «тыныштандыруға тырысқанын» айтып ақпарат таратқан еді. Алайда марқұмның анасы мен қорғаушы бұл мәліметтің жалған екенін мәлімдеді. 

Оған қоса, кешегі ішкі істер министрінің орынбасары Санжар Әділовтің: «қылмыстық іс тікелей өз бақылауында әрі тергеу әрекеті жалғасып жатыр» деген сөзіне қатысты пікірін білдірді. Оның айтуынша, іс Бас прокуратураның бақылауына өткенін БАҚ-тан білген екен. Оған жеке ешкім хабарласпағанын айтты. Ал Алматыдағы тергеушілер заңгерге еңбек демалысына кеткенін айтып, «кейін кел» деп істі толық қарап шығуына мүмкіндік бермей, уақытты созып жатыр екен. 

Еске сала кетсек, 22 жастағы марқұмның анасы полицияның әрекетіне наразылық білдіріп өткізген алғашқы баспасөз мәслихатына Orda.kz тілшісі қатысып, ақпарат жариялады.