Ақнар Гүлістан ісі: Ішкі істер министрлігі үнсіз қалмады

Ішкі істер министрінің орынбасары Санжар Әділов КИМЭП түлегі Ақнар Гүлістанның өліміне қатысты тергеу барысы туралы жауап берді, деп хабарлайды Orda.kz.

Санжар Әділовтің айтуынша, істегі барлық бейнежазбаларға арнайы сараптама тағайындалған. Алайда, ол қыздардың неге күдікті ретінде танылмағанын айтпады.

«Тәркіленген бейнежазбалар бойынша сараптама жүргізіліп жатыр. Сарапшылардың қорытындысын күтеміз. Барлық жазбалар мұқият тексеріледі. Қазір бұл іске байланысты бірнеше куә бар. Жәбірленуші тараптың уәждері де жеке-жеке тексерілді. Қыздардан қорғауға құқығы бар куә ретінде жауап алынған. Қазіргі уақытта тергеу әрекеттері жалғасуда», — деді Әділов.

Ішкі істер министрінің орынбасары Санжар Әділовтің айтуынша, бұл қылмыстық іс тікелей өз бақылауында.

Еске сала кетейік, 2024 жылы 20 шілдеде Алматыда 22 жастағы КИМЭП түлегі Ақнар Гүлістан тұрғын үйдің жетінші қабатынан құлап, көз жұмды. Марқұм қыздың анасы мен туыстары Ақнәрді азаптап сосын терезеден лақтырып жіберген деп, сол түні қасында болған екі қыздан күдіктенетін айтты. Оған қоса өткен аптада сол екі қыздың бірі Дидар Мұқиятттың адвокаты баспасөз мәслихатында Дидар Мұқияттың Ақнәр терезеден құлаған кезде дәретханада болғанын айтып, оның кінәсіз екенін жеткізді.