Әкімдер жылу маусымында энергия нысандары дайындығы үшін жеке жауап береді

Премьер-министр Олжас Бектенов өңір әкімдері Қазақстандағы энергия нысандарының дайындығы үшін дербес жауапкершілік арқалайтынын деп мәлімдеді, деп хабарлайды Orda.kz.      

«Қазіргі таңда Үкімет резервінен 25 млрд теңгеден астам қаржы бөлу мақұлданды. Бұл қаражат Жетісу облысы, Абай облысы, Ақмола облысы және Шығыс Қазақстан облысында жылу көздерін жөндеуге және салуға, сондай-ақ төрт өңірде шамамен 30 шақырым жылу желілерін жөндеуге бағытталады. Қаражаттың тиімді жұмсалуын және алынған нәтижені бақылау қажет. Қазірдің өзінде кейбір өңірлерде жұмыстардың созылып кету қаупі байқалады. Егер күзде өңірлерде дайындық паспортын алмау фактілері тіркелсе, әкімдер жеке жауап береді», — деді Бектенов үкімет отырысында

Үкімет басшысы өңір әкімдіктеріне екі апта ішінде барлық конкурстық рәсімдерді өткізіп, жөндеу жұмыстарына кірісуді тапсырды.

«Мұнда артық бюрократия болмауы тиіс. Жылумен жабдықтау нысандарын жөндеу жұмыстары тамыз айының соңынан кешіктірілмей аяқталуы қажет. Өнеркәсіп және құрылыс министрлігі мен өңір әкімдіктері 1 қыркүйекке дейін білім беру және денсаулық сақтау нысандарының толық дайын болуын қамтамасыз етуі тиіс. Солтүстік, орталық және шығыс өңірлерде барлық инженерлік инфрақұрылым мен тұрғын үй-коммуналдық шаруашылық нысандары 15 қыркүйекке дейін, ал қалған өңірлерде 15 қазанға дейін толық дайын болуы қажет», — деп нақтылады ол. 

Сонымен қатар, премьер-министр әкімдерге нысандарға тұрақты түрде барып, жағдайды жеке бақылауда ұстауды тапсырды.

Оқи отырыңыз:

• Өскемендегі «Қазмырыш» кәсіпорнында жарылыс: Премьер-министр тапсырма берді
• Түтін тұншықтырды: Алматы аспаны зиянды шығарындылардан арылмай тұр  
• Қазақстанның бір өңірінде екі АЭС салу қажеттілік пе?