Айына 145 мың теңге алатын қазақстандықтар жеке табыс салығынан босатылады 

Ал қазақстандықтардың жылдық табысы 36 млн теңгеден асқан жағдайда, ол кірістерге жоғары мөлшерлемедегі жеке табыс салығы салынады, деп хабарлайды Orda.kz.       

Биылдан бастап айына шамамен 145 мың теңге көлемінде табыс табатын қазақстандықтар жеке табыс салығын (ЖТС) төлеуден босатылады.

Ал айына 3 млн теңгеден немесе жылына 36 млн теңгеден артық табыс табатын азаматтар жоғары мөлшерлеме бойынша ЖТС төлеуге міндетті болады. Бұл туралы жұма күні өткен брифингте қаржы министрлігінің мемлекеттік кірістер комитетінің салықтық әдіснама басқармасы басшысының орынбасары Айгүл Аббасова мәлімдеді.

Оның айтуынша, жаңа Салық кодексінде 30 айлық есептік көрсеткіш (АЕК) мөлшерінде базалық шегерім қарастырылған. Бұл бір күнтізбелік айға шамамен 129 750 теңге болады. Аталған сомаға жеке тұлға өзінің табысын азайта алады.

«Айына шамамен 145 мың теңге көлемінде төмен табыс алатын азаматтар жеке табыс салығын төлемейді», – деп түсіндірді Айгүл Аббасова. 

Ал жоғары табыс табатындар, яғни жылына 36 млн теңгеден немесе айына шамамен 3 млн теңгеден артық кірісі бар азаматтар салықты жоғарылатылған мөлшерлеме бойынша төлейді.

«36 млн теңгеден асатын табыс бөлігіне 15 пайыз мөлшерлеме бойынша салық салынады», – деп еске салды ол. 

Осылайша, айына 145 мың теңгеден көп, бірақ 3 млн теңгеден аз табыс табатын азаматтар үшін жеке табыс салығының 10 пайыздық мөлшерлемесі сақталады, деп қорытындылады Айгүл Аббасова.

Айта кетсек, 2026 жылғы 1 қаңтардан бастап Қазақстан Республикасының жаңа Салық кодексі күшіне енді. Ол жеке табыс салығы (ЖТС) саласында елеулі өзгерістерді қарастырады.

Негізгі өзгерістер:

  • ЖТС-тің жаңа құрылымы енгізілді: табыстарды жіктеу, салықтық жеңілдіктерді жүйелеу.
   Прогрессивті мөлшерлемелер енгізілді:
   • 8 500 АЕК-ке дейін (≈ 33,4 млн тг) – 10%.
   • 8 500 АЕК-тен жоғары – артық сомасына 15%.
   • Жеке практикамен айналысатын тұлғалардың (нотариустар, адвокаттар, медиаторлар, сот орындаушылары) табыстары 9% мөлшерлемемен салық салынады.
   • Дивидендтер бойынша 30 000 АЕК-ке дейінгі жеңілдік жойылды. Жаңа шкала: 230 000 АЕК-ке дейін – 5%, одан жоғары – 15%.
   • Жеке кәсіпкерлер мен шаруа қожалықтары үшін жалпыға бірдей белгіленген тәртіппен:
   • 230 000 АЕК-ке дейін – 10%,
   • одан жоғары – 15%.
   • Шаруа қожалықтарына салық сомасын 70%-ға азайту құқығы берілді (3%).

Еске салсақ, Қазақстанның жаңа салық кодексінде  10 жылдан асқан көліктерге салынатын салық 30%-ға төмендетілді.

Оқи отырыңыз:

• Қазақстан президенті жаңа Құрылыс кодексіне қол қойды
• 2026 жылдың алғашқы 10 күнінде 66 мың қазақстандық өзін-өзі жұмыспен қамтыған
• Теңселген теңгеге теңгерім бар ма: доллар жақында 600-ден сатылады