Кодексте ескі көліктер салығы төмендетілді

Қазақстанның жаңа салық кодексінде 10 жылдан асқан көліктерге салынатын салық 30%-ға төмендетілді.

Қазақстанның жаңа салық кодексінде 10 жылдан асқан көліктерге салынатын салық 30%-ға төмендетілді, деп хабарлады ҚР Ұлттық экономика вице-министрі Азамат Әмрин.

«Жеке тұлғаларға салық салу туралы жаңа кодекс Бірыңғай зейнетақы қорынан төленетін зейнетақы төлемдерін жеке табыс салығынан (ЖТС) босатуды, 10 жылдан асқан автокөліктер үшін салық сомасын 30 пайызға, ал 20 жылдан асқандарға  50%-ға  азайтуды көздейді», - деді Әмрин Қоғамдық палата отырысында Қазақстанның жаңа Салық кодексі жобасын талқылау барысында.

Оның айтуынша, қымбат заттарға, көліктерге, алкогольдік ішімдіктерге, темекі өнімдеріне, ұшақтарға да салық салуды күшейту ұсынылады. Мүлік салығы бойынша салық салынатын базаны анықтау кезінде люкс факторы енгізілуде, мәслихаттарға салық салу құнын 50%-ға дейін көтеру құқығы беріледі.