Айдос Садықовқа оқ атқан адам қазір полиция қызметкері емес – ІІМ

Қазақстан ішкі істер министрлігі «Айдос Садықовқа оқ атқан адам қазір полиция қызметкері емес» деп жауап қайтарды.

Бұл туралы ҚазТАГ хабарлады.

Еске сала кетейік, Украина полициясы Айдос Садықовқа оқ атқандардың бірі бұрынғы полиция қызметкері Мейрам Қаратаев екенін анықтаған соң, Наталья Садықова өз сөзінде «Оқ атқан өз ісінің шебері екенін, ал тапсырыс берген президент екенін айтқанда қателеспеппін» деген болатын.

«М.Қаратаев атты азамат 2019 жылдың қаңтарында ішкі істер органдарынан жұмыстан шығарылған. Қазір ол полиция қызметкері емес екенін хабарлаймыз. Қазір мемлекет басшысының тапсырмасына сәйкес істің барлық мән-жайын анықтау үшін тиісті шараларға тез арада кірісіп жатырмыз. Істің нәтижесі жайлы ақпарат береміз» деп мәлімдеді ішкі істер министрлігі.

Еске сала кетейік, 18 маусымда Киевтегі үйінің жанында белгісіз біреулер Айдос Садықовқа оқ атты.  «Бәсе» атты оппозициялық жобаның авторына оқ атылғанда қасында оның жұбайы әрі осы жобаның мүшесі Наталья Садықова болған. Ол жарақат алған жоқ. Бұған дейін Айдос Садықовтың «Бәсе» арнасында Тоқаевты сынаған Ресейдің «қуыршағы» делінетін бейнежазба жарияланған болатын. 

Кейін жарақат алған журналистке ота жасалғаны және жансақтау бөлімінде жатқаны белгілі болды. Маусымның 19-ы күні осы іске қатысты Қасым-Жомарт Тоқаев пікір білдіріп, осы мәселені шешу үшін Украина тарапына ресми сұрау салып, қажет болған жағдайда қазақстандық қызметкерлер тергеу ісіне араласып, шындықты ашуға көмектесетінін мәлімдеді.