Air Astana рейсі кешігіп, Қазақстан азаматтары Сеул әуежайында бір тәуліктен аса тұрып қалды

Қазақстан азаматтары Air Astana әуе компаниясы рейсінің кешіккеніне байланысты Сеул әуежайында тұрып қалды, деп хабарлайды «Ақ жайық» басылымына сілтеп Orda.kz.       

«Сеулде Air Astana рейсі кешігіп, жолға шыққан жолаушылар әуежайда тұрып қалды. Инчхон (Сеул) халықаралық әуежайындағы жолаушылардың арасында Атырау облысының тұрғыны Райымбек Дауылбаев та бар, ол онкологиялық емдеуден кейін үйіне оралмақшы болған» деп жазылған хабарламада. 

Кесте бойынша ұшақ 11.00-де ұшып кетуі тиіс еді, бірақ алдымен ұшу 16.00-ге, содан кейін келесі күнге шегерілді.

«Бастапқыда бізге ештеңе түсіндірместен есік алдында ұзақ уақыт ұстап тұрды. Бес сағаттан кейін ғана рейстің тоқтатылғаны хабарланды. Демалыс күні болғандықтан Air Astana өкілдері мұнда жоқ», - дейді Дауылбаев. 

Куәгерлердің айтуынша, әуежай қызметкерлері ұшақтың шассиін қарап шыққан, бұл техникалық ақауларға қатысты болуы мүмкін.

Жолаушылар ақпарат пен қолдаудың жоқтығына шағымданады.

«Емделгеннен кейін мен үйіме жетуді армандадым. Ал оның орнына  әуежайда бір тәулік бойы ешбір көмексіз және түсіндірусіз қаңтарылып тұрмыз, - деді Дауылбаев.

«Ақ Жайық» Air Astana әуе компаниясына ресми сұрау жібергенін мәлімдеді.

Биылғы 9 тамызға қараған түні Air Astana KC955 авиакомпаниясының Алматыдан Астанаға ұшқан рейсі  төтенше жағдай салдарынан бірнеше сағатқа кешіктірілді.

2025 жылдың 24 наурызына қараған түні әлеуметтік желілерде Алматы халықаралық әуежайында техникалық және интернетке қатысты ақаулар туралы ақпарат тарады. Жолаушылар билет берудің кешігуіне шағымданған болатын. 

23 тамызда сағат 10: 25-ке жоспарланған Fly Arystan авиакомпаниясының Қарағандыдан Анталияға ұшатын рейсі әуе кемесіне  соғылған құстың кесірінен уақытында ұшып кете алмады.