Аида Балаева министрліктің заңгерлері «Орда» редакциясына қатысты істі қарайтынын айтты

Мәдениет және ақпарат министрлігінің заңгерлері істі болған ҚазТАГ пен «Орда» редакцияларына көмектесу үшін істі егжей-тегжейіне дейін қарап жатыр. Ақорда дәлізінде Аида Балаева журналистердің сұрақтарына жауап бергенде осыны айтты, деп хабарлайды Orda.kz.

Orda.kz пен ҚазТАГ-қа қатысты сот ісін қадағалайтынын, заңгерлердің осы іспен айналысатынын айтты. Ол Бажкенованы министрліктен қаражат алмай, өз бетінше жұмыс істесе де, қолдап жүретінін айтты.

«Біріншіден, егер сот процесі болса немесе қылмыстық істер қаралып жатса, біз оған тікелей қатыса алмаймыз. Десе де, біздің заңгерлер осы жағдайды егжей-тегжейіне дейін қарап жатыр. Біз Әсет Матаевпен байланыстамыз. Бажкенованы өздеріңіз білесіздер. Қанша жыл ол біздің министрліктен қаражат алмаса да, мен Гүлнәр Бажкенованы әрдайым қолдап жүретін адаммын. Ол өзі де бірнеше сұхбаттарында «Аида Балаева қолдап жүр» деп айтты. Бұл жерде заң тұрғысынан қарауымыз керек. Біздің заңгерлер олармен жұмыс істейді», – деді Аида Балаева.

Министрдің бұл сөзін журналист Динара Сәтжан жариялады.

Айта кетейік, ҚазТАГ агенттігінің басшыларына қарсы қылмыстық іс қозғалғаны туралы жазған едік. Ал 1 желтоқсан күні «Орда» редакциясының бас редакторы Гүлнәр Бажкенованы үйқамаққа қамап, пәтері мен кеңселеріне тінту жүргізілді. Қарулы күштер кеңсеге баса-көктеп кіріп, ноутбуктарды, журналистердің жеке ұялы телефондарын және кеңседегі ақшаны алып кетті. Редакция қазір жалақысыз жұмысын жалғастырып жатыр.

Қазіргі жүйенің еркін адамдарды қамап, бұғауда ұстауы жалпы қоғамды қалай құлдырататыны жайлы материалымыздан оқыңыз.