Әділет Алмат Азия чемпионы атанып, 4 жыл үзілістен кейін елге дзюдодан алтын әкелді

Дзюдодан Қытайдың Ордос қаласында Азия чемпионатының екінші күні мәресіне жетті, деп хабарлайды Orda.kz ҚР Туризм және спорт министрлігі Спортты дамыту дирекциясының баспасөз қызметіне сілтеп.

Әділет Алмат финалда 81 келідегі салмақта Париж Олимпиадасының қола жүлдегері Сомон Махмадбековпен белдесті. Нәтижесінде отандасымыз қарсыласын ауырту әдісімен жеңіп кетті.

Айта кетейік, бұған дейін 2022 жылы Данияр Шамшаев Астанада өткен сары құрлықтың додасында топ жарған еді.

Әділет Алматтың бұл Азия чемпионатындағы бірінші жүлдесі. Ол 2023 жылы жастар арасында Азия чемпионы атағына да қол жеткізген болатын.

Жарыстағы жолы:

• 1/8 финал. Шыңғысхан Сағыналиев (Қырғызстан)
• 1/4 финал. Абылайхан Жұбаназар (Қазақстан)
• 1/2 финал. Бехрузи Хожазода (Тәжікстан)

Ол былтыр дзюдодан Испанияның Ла Нусия қаласында өткен Еуропаның ашық кубогында чемпион атанған болатын.

Отандасымыз ол кезде 81 келіде белдесіп, турнир барысында 6 кездесу өткізді. Ол алғашқы белдесуінде германиялық Томас Петерден, 1/16 финалда Наик Херковичтен, 1/8 финалда болгар балуаны Христо Валковтан басым түсті. Ал ширек финалда Бразилия дзюдошысы Энзо Тромбинидің осал тұсын таба білді. Жартылай финалда испан спортшысы Жорге Кано Гарсиядан айласын асырса, финалда неміс балуаны Тимо Кавелиусты қапы қалдырды. 

Оқи отырыңыз:

• 2026 жылы қандай спорт нысандары салынады: «Медеу» жөнделіп жатыр
• Спортшыларымыз алғашқы тоқсанда елге 200 медаль әкелді
• Спортшыларымыз халықаралық аренада бірнеше жарқын нәтиже көрсетті