Абу Дабиде Ресей, АҚШ және Украина арасындағы келіссөздер басталды

Біріккен Араб Әмірліктерінің Сыртқы істер министрлігі хабарлағандай, кездесулер 23 қаңтарда басталып, екі күнге созылады, деп хабарлайды Orda.kz.

Келіссөздер барынша жабық форматта өтуде. Өтетін орны жария етілмеген, әзірге баспасөз өкілдерінің қатысуы да қарастырылмаған.

Қазіргі таңда белгілі болғаны — Ресей делегациясын Ресей Қарулы күштері Бас штабының Бас барлау басқармасының (ГРУ) басшысы Игорь Костюков, ал Украина делегациясын президент кеңсесінің басшысы Кирилл Буданов пен Ұлттық қауіпсіздік және қорғаныс кеңесінің төрағасы Рустем Умеров бастап отыр.

Көптеген БАҚ мәліметінше, алғашқы үшжақты кездесу барысында Мәскеу Дональд Трамп пен Владимир Путин арасында Анкоридж саммитінде жасалды делінетін келісімдерге табанды түрде тоқталмақ. Әңгіме Украина тарапынан аумақтық жеңілдіктер жасау, соның ішінде Киевтің бақылауында қалған Донецк облысының аудандарын беру, сондай-ақ елдің шығысы мен оңтүстігіндегі басқа өңірлерде қазіргі майдан шебін қатырып қою туралы болып отыр.

Абу Дабидегі келіссөздер соңғы күндері күшейген дипломатиялық байланыстар аясында өтуде. Бұған дейін Мәскеуде Владимир Путин АҚШ-тың арнайы өкілдері — Стив Уиткофф, Джаред Кушнер және Джош Грюнбауммен шамамен төрт сағатқа созылған кездесу өткізген болатын.

Ал бұған дейін Украина президенті Владимир Зеленский Давоста өткен Дүниежүзілік экономикалық форум аясында Дональд Трамппен келіссөздер жүргізді.

Оқи отырыңыз:

• Тоқаев Давоста Қазақстанның Бейбітшілік кеңесіне қосылатыны туралы құжатқа қол қойды
• Тоқаев Конституциялық комиссия құру туралы жарлыққа қол қойды
• Оспадарсыз әлеуметтік сақтандыру: қайтыс болғандарды қабылдауға жазып, ер адамдарды әйелдерге арналған скринингтен өткізген