Тоқаев Конституциялық комиссия құру туралы жарлыққа қол қойды

Қазақстан президенті Конституциялық реформа жөніндегі комиссия құру туралы жарлыққа қол қойды. Жаңа органның негізгі мақсаты — елдің Негізгі заңына өзгерістер енгізу бойынша ұсыныстар әзірлеу, деп хабарлайды Orda.kz.

Құжатты Ақорданың баспасөз қызметі жариялады.

Жарлықпен комиссияның ережесі мен құрамы бекітілді. Оның орындалуын бақылау Президентінің әкімшілігіне жүктелді.

Тоқаев жанындағы консультативтік-кеңесші орган Конституцияны реформалау жөніндегі ұсыныстарды дайындаумен, сондай-ақ оларды құқықтық және ұйымдастырушылық тұрғыдан пысықтаумен айналысады.

«Комиссия өз қызметінде Қазақстан Республикасының Конституциясын, заңдарын, Қазақстан Республикасы Президенті мен Үкіметінің актілерін, өзге де нормативтік құқықтық актілерді, сондай-ақ, осы ережені басшылыққа алады», – деп жазылған хабарламада. 

Комиссия құрамына төраға, төрағаның орынбасарлары, хатшы және комиссия мүшелері кіреді.

Комиссия құрамына Парламент депутаттары, мәслихат басшылары, бұқаралық ақпарат құралдарының өкілдері, қоғам қайраткерлері, сарапшылар мен мемлекеттік қызметшілер енді.

Комиссия төрағасы болып Конституциялық соттың төрайымы Эльвира Азимова тағайындалды.
Төраға орынбасарлары — мемлекеттік кеңесші Ерлан Карин және Премьер-Министрдің орынбасары — Мәдениет және ақпарат министрі Аида Балаева.
Хатшы — Қазақстан Республикасы Президенті Әкімшілігінің мемлекеттік-құқықтық бөлімінің меңгерушісі Айдар Жарылғанов.

Жарлық қол қойылған сәттен бастап күшіне енді

Оқи отырыңыз:

• Мемлекеттік кеңесші лауазымы жойылады, екі ай ішінде президент сайлауы өткізіледі
• Елімізде жаңа билік органы — Халықтық кеңес құрылды
• Тоқаев Құрылтай төрінде Самұрық-Қазына қорына сын айтты
• Қызылордада тарихи Ұлттық құрылтайдың V отырысы басталды