Абай облысында күйеуін құтқарамын деп адам өлтірген әйел бостандыққа шықты

Күйеуін қорғаған әйел кассациялық тәртіпте ісі қайта қаралып, бостандыққа шықты, деп хабарлайды  Orda.kz.      

2024 жылғы шілде айында Абай облысында азаматша С. күйеуін құтқаруға тырысып, оны тұншықтырып жатқан ер адамға ағаш сынығымен бір рет қатты соққы жасаған. Сол кезде шабуыл жасаған адам оның күйеуінің мойнын аяғымен басып тұрған. Алған жарақат салдарынан шабуыл жасаушы көз жұмды.

Аудандық сот С.-ны Қылмыстық кодекстің 106-бабы 3-бөлігі бойынша кінәлі деп танып, 6 жылға бас бостандығынан айырған болатын. Сонымен қатар, одан моральдық зиянды өтеу ретінде 3 миллион теңге өндірілген. Облыстық сот үкімді өзгеріссіз қалдырды.

Кассациялық шағымда сотталған әйел мен және оның адвокаты оқиғаның күйеуін шабуылдан қорғау кезінде болғанын көрсетіп, сотталғанның әрекетін неғұрлым жеңіл бапқа қайта саралауды сұраған.

Кассациялық сот С.-ның өз күйеуін қорғау мақсатында әрекет еткенімен келісті. Сонымен бірге, сот оның басынан ауыр затпен соққы жасау арқылы қажетті қорғаныс шегінен шығып кеткенін ескерді.

Сонымен қатар, оның жасаған ісіне өкінгені, кәмелетке толмаған баласының болуы, III топтағы мүгедектігі, сондай-ақ оқиғаға себеп болған жәбірленушінің өзiнің құқыққа қайшы мінез-құлқы ескерілді.

Нәтижесінде кассациялық сатыдағы сот алдыңғы сот актілерін өзгертіп, С.-ның әрекетін Қылмыстық кодекстің 112-бабының 2-бөлігіне қайта саралап, оған бір жылға бас бостандығынан айыру жазасын тағайындады. Кассациялық қарау кезіне қарай бұл мерзім толық өтеліп қойғандықтан, С. сот отырысы аяқталғаннан кейін қамаудан босатылды (№ 6003-25-00-1к/1712-2).

Оқи отырыңыз:

• «Батыс» өңірлік қолбасшылығы әскерлері қолбасшысы тағайындалды
• Иранның Ормуз бұғазын аша алмау «себебі» белгілі болды
• Иран АҚШ-тың қарулы соғысына «логистикалық соғыспен» жауап беріп, стратегиялық тығырыққа тіреді