Абай облысында «ELL QUATY» атты пирамиданың басшысы қолға түсті

24 қараша 2025 10:24 Альфия Адамбек

Фото: Kapital.kz

Абай облысында тұтыну коорперативі ретінде жасырынып жұмыс істеген «ELL QUATY» атты қаржы пирамидасының қызметі тоқтатылды, деп хабарлайды Orda.kz.

ҚМА мәліметінше, ұйымдастырушылар азаматтарды «HALYK QUATY» кооперативіне мүше болуға шақырып, тұрғын үй мен автокөліктерді пайызсыз бөліп төлеу арқылы алуға болады деп сендірген.

«halykquaty.kz сайты мен әлеуметтік желілерде өз қызметін жарнамалап, «әр отбасыға бақыт!» деген ұранды қолданған. Осылайша олар өзін «халықтық кооператив» ретінде көрсетіп, жалған бедел қалыптастырған», деп хабарлады ҚМА.

«HALYK» тауарлық белгісін заңсыз пайдаланғаны үшін әкімшілік жауапкершілікке тартылғаннан кейін кооператив атауы «ELL QUATY» болып өзгертілді.

Қылмыстық жолмен түскен табысты заңдастыру мақсатында ұйымдастырушы өз атына «QAZ INFO MARKET» ЖШС-ны тіркеп, салымшылардан түскен қаражатты шығарып отырған. Пирамидаға 1,5 мыңнан аса салымшы жалпы 6,8 млрд теңге қаржы құйған. «ELL QUATY» ұйымдастырушысы қамауға алынды.

Айта кетейік, сәуірде «Qnet» қаржы пирамидасын құрғандар сотталды.

Жаңалықтар

барлық жаңалықтар