7 сәуірден бастап жаңа ипотекалық бағдарлама іске қосылады

«Орда Аймақ» деп аталатын жаңа ипотекалық бағдарлама 7 сәуірден бастап іске қосылады, деп хабарлайды Orda.kz. 

Бағдарлама ҚТК кепілдігімен құрылысқа үлестік қатысу туралы шарт бойынша салынып жатқан тұрғын үйді сатып алуға мүмкіндік береді. Өтінімдерді қабылдау «Отбасы банк» АҚ арқылы жүзеге асады. Бұл ретте несие рәсімдеушінің «Отбасы банкінде» депозиті болуы немесе меншігінде тұрғын үйі болмауы міндетті емес. Бұл бағдарламаға 21 жастан асқан қазақстандықтар қатыса алады.

Жаңа бағдарлама бойынша белгіленген сыйақы мөлшерлемесі 15,9%. Бастапқы жарна – сатып алынатын тұрғын үй құнының 20%-ы. Қарыз сомасы - 1 млн теңгеден 75 млн теңгеге дейін беріледі. Несиелеу мерзімі 20 жылды қамтиды. 

Еске салайық, бұған дейін ҚР Ұлттық банкі 2025 жылға арналған ипотекалық тұрғын үйді несиелендірудің «7-20-25» бағдарламасына енгізілетін өзгерістер туралы айтты.