«51 млн артық төленген»: Ақтөбеде аудиторлар мониторинг жасаған мектептің 2 есепшісі жұмыстан шығып кетті

Ақтөбелік аудиторлар бір мектептен 51 млн теңге артық төленген ақшаны анықтады. Қазына қаржысына тексеріс жүрген тұста есепшілер жұмыстан кетті, деп хабарлайды Orda.kz. 

Ақтөбе облысында аудиторлар назарына тағы бір мектеп ілікті. Шалқар ауданындағы №5 мектеп-лицейінен 51 млн 448 мың теңге болатын заң бұзушылықтар анықталды. Екі жыл бойы 19 қызметкерлерге артық ақша аударылған. 

Тексеріс 2023-2024 жылдары мектептің кей қызметкерлерге еңбек ақысының 50%-нан артық аванс төлегенін анықтап берді. 

2024 жылы аудиторлық тексеріс басталған тұста  мектеп есепшілері артық төленген ақшаны қайтара бастаған. Осы тұста мектептен  2 есепші жұмыстан шығып кетті. 

Осылайша бір мектеп екі жылда 19 қызметкерге 51 млн теңгені артық төлеген. Аудиторлар қаржылық заң бұзушылықтарға жол берген тұлғалардың жауапкершілігін қарау туралы нұсқама берді.

Айта кетейік, 2024 жылы Шалқар ауданында білім бөлімінің басшысы Қази Жұмаханов қызметін асыра пайдаланғаны үшін сотталды. Ол мектеп директорлары мен балабақша меңгерушілерінен ақша жинап, жеке мақсатқа жұмсап жіберген деп айыпталды. 

Сонымен қатар биыл Шалқар ауданында «Пара алу» бабымен екі шенеунік абақтыға қамалды. Аудан әкімінің орынбасары мен ТҮКШ бөлімінің басшысы мердігерден тендерден ұтқан ақшаның 1%-ін алған.

Автор: Ардақ Ерубаева