«40 адамның қызметін енді компьютер атқарады»: Алматы метросында мамандар жұмысынан айырылуы мүмкін

Алматы метросында қаржы тапшылығын шешудің тағы бір жолы табылғанға ұқсайды. Бірақ бұл жолы мәселені техникамен емес, адамдармен «реттемек». Бүгін метро маңына жиналған 40-қа жуық оператор-кассир жұмыссыз қалу қаупіне шағымданды, деп хабарлайды Orda.kz.       

Олардың айтуынша, метрополитен басшылығы қызметкерлерді қысқартуға дайындалып жатыр, ал себеп ретінде қаржының жетіспеуі мен кейбір жұмыстың енді компьютерлер арқылы атқарылып жатқаны айтылған.

Қызметкерлердің сөзінше, Алматы метросы жалпы 132 адамды қысқартуды жоспарлап отыр. Алайда бұл туралы оларға ресми түрде ешкім хабарламаған. Жұмысшылардың айтуынша, әзірге ешқандай жазбаша ескерту берілмеген, тек ауызша түрде «қысқарту болады» деп айтылған.

Бүгін метроның маңына жиналған 40 қызметкер басшылықтан бір ғана нәрсе талап етті: егер қысқарту рас болса, онда оларды жай ғана есікке итеріп шығармай, басқа жұмыс тауып берсін.

Наразылыққа шыққандардың бірі — оператор-кассир Татьяна Николаева. Ол метрополитен ашылған күннен бері жұмыс істеп келеді және бұл салада 15 жыл еңбек өтілі бар.

«Мен Николаева Татьянамын, оператор-кассирмін. Метрополитен ашылған күннен бастап жұмыс істеймін. Қазір ғана жиналыс өтті. Бірақ ешқандай ортақ шешімге келе алмадық, ештеңе туралы келіскен жоқпыз», — дейді ол. 

Қызметкерлердің айтуынша, олар өз құқықтарын қорғау үшін адвокат жалдауға мәжбүр болған. Бірақ бүгінгі кездесуден кейін де нақты жауап ала алмаған.

«Бізбен бірге адвокат болды, оны жалдап қойдық. Басшылық тарапынан нақты әрекет көрген жоқпыз. Қысқаша айтқанда, бірдеңе істейміз, бір өзгерістер болады, мүмкін қандай да бір жолын табамыз деген сөздер айтылды. Бірақ бізге қысқарту бәрібір болатынын түсіндірді», — дейді Татьяна. 

Оның сөзінше, метрополитендегі қысқарту жай ғана кадрлық өзгеріс емес, кәсіпорынның қаржылық мәселесін қызметкерлердің есебінен шешу әрекетіне ұқсайды.

«40 қызметкер қысқартылады. Осылайша біздің «Метрополитен» ММК қаржылық мәселелерін шешкісі келеді. Өйткені қаржы жетіспейді», — дейді қызметкер.

«Жазбаша ештеңе берген жоқ»

Жиналған қызметкерлерді алаңдатқан жалғыз нәрсе — жұмыссыз қалу емес. Олардың айтуынша, қысқарту туралы ресми ескерту де берілмеген. Яғни, адамдармен еңбек заңнамасында көзделген тәртіппен емес, жай ғана ауызша сөйлескен.

Қызметкерлердің сөзінше, оларға қысқарту болатыны айтылғанымен, нақты кімнің, қашан және қандай негізде жұмыстан кететіні түсіндірілмеген. Басқа лауазым ұсынылмаған, балама жұмыс туралы да анық жауап жоқ.

Сондықтан бүгін жиналған 40 оператор-кассирдің талабы қарапайым: егер олардың жұмысын шынымен компьютерлер алмастырып жатса, онда метрополитен басшылығы оларды далада қалдырмай, басқа жұмыс ұсынуы керек.

Компьютерлер келіп, адамдар артық болып қалды ма?

Қызметкерлердің айтуынша, метрополитендегі кейбір функцияларды қазір компьютерлер атқара бастады. Соның салдарынан операторлардың еңбегі бұрынғыдай қажет емес деген түсінік қалыптасқан. Ал қаржы тапшылығы бұл процесті жеделдеткен сияқты.

Басқаша айтқанда, метро басшылығы екі мәселені бір шешіммен жапқысы келетіндей көрінеді: шығынды азайту және «артық» штаттан құтылу. Бірақ бұл шешімнің ар жағында 10–15 жылын метроға арнаған адамдар тұр.

Жиналғандардың арасында метрополитенде ұзақ жылдар бойы жұмыс істеген қызметкерлер аз емес. Кейбірі ашылған күннен бері еңбек етіп келеді. Енді сол адамдардың өздері, сөздерінше, бір күнде қажетсіз болып шыға келген.

Orda.kz  тілшісі метро әкімшілігінен ресми пікір алуға тырысты бірақ басшылық жиналыста деп пікір білдіруден бас тартты.

Оқи отырыңыз:

• Шілде айынан бастап Қазақстанда әскерге шақыру цифрландырылады
• Ресейдегі газ өңдеу зауытына жасалған шабуыл Қарашығанақ газына қатысты мәселені қайта көтерді