«Саусағын сындырып, тиын жұтқызған»: «Қазақмыс» қызметкері 8 жастағы балаға тиісті деп айыпталды

Балқаш қаласында «Қазақмыс» кәсіпорнының қызметкеріне 8 жастағы баланы соққыға жықты және азаптады деген айып тағылды. Анасы істің жабылып қалатынынан қорқады, деп хабарлайды Orda.kz.

Stan.kz мәліметінше Мәдина Маратқызы атты келіншектің 8 жасар ұлын ер адам өз бетінше жазалаймын деп айуандықпен балаға физикалық әрі психикалық қастық қылған. Ол баланың денесін күйдіріп, саусағын сындырып, қатты заттармен ұрып, тиын жұтуға дейін мәжбүрлегенін айтты. Салдарынан бас ми жарақатын алған баланың қан қысымы 150/100-ге дейін көтерілген. Ал қастық жасаған адамның екі баласы бар әке екені анықталды. Ол «Қазақмыстың» Балқаштағы қызметкері Алмас Басымбеков, оның әйелі де сол жерде жұмыс істейді екен.

Анасының айтуынша, қазір күдіктілер полицияда, ауруханада және басқа да мемлекеттік мекемелерде жұмыс істейтін туыстары мен достары арқылы істі жабуға тырысып жатыр екен. Зардап шеккен баланың анасы тергеу құпиялылығына байланысты толық ақпарат беруден бас тартты. 

«Қазақмыс» компаниясының бас директоры Жәнібек Байғабылов Балқашта Алмас Басымбековтың жұмыс істейтінін растады. Алайда ол Kazakhmys Smelting компаниясының қызметкері емес екенін мәлімдеді. 

Қарағанды облыстық полиция департаментінің баспасөз қызметі оқиға бойынша қылмыстық іс қозғалғанын және тергеу амалдары жүргізіліп жатқанын хабарлады. Сонымен қатар, тергеу шаралары мен бірқатар сараптамалар тағайындалатыны айтылды.