35 градусқа дейінгі аяз: Оқушылар қашықтан оқытуға көшірілді

Шығыс Қазақстан облысы мен Абай облысында қатты аяз бен көктайғаққа байланысты 13 ақпанда бірқатар мектептер қашықтан оқыту форматына ауысты, деп хабарлайды Orda.kz.      

Абай облысы

Семей қаласында 1–9 сынып оқушыларының бірінші ауысымдағы сабақтары онлайн форматқа көшірілді.

Бесқарағай ауданында сегіз мектептің 1–9 сынып оқушылары, сондай-ақ 13 мектептің 1–11 сынып оқушылары қашықтан білім алады.

Көкпекті ауданында үш мектептің 1–4 сыныптары дистанциялық оқытуға ауыстырылды.

Жаңасемей ауданында алты мектептің 1–4 сыныптары және бір мектептің 1–9 сыныптары онлайн оқуға көшті.

Бородулиха ауданында 18 мектептің 1–4 сыныптары, сондай-ақ тағы екі мектептің 1–4 сыныптары қашықтан білім алуда.

Мұндай шешім қатты аяз бен көктайғаққа байланысты қабылданды.

Шығыс Қазақстан облысы

Риддер қаласында ауа температурасы –26,6 градус болғандықтан, қаладағы барлық мектептердің бірінші ауысымдағы 0–4 сынып оқушылары қашықтан оқыту форматына көшірілді.

Алтай қаласы мен бірқатар ауылдық мектептерде ауа температурасы –28…–35 градусқа дейін төмендеуіне байланысты Алтай қаласындағы және сегіз ауыл мектебіндегі 0–4 сыныптар (бірінші және екінші ауысым), сондай-ақ төрт мектептің 0–9 сыныптары және Михаил Бикетов атындағы мектептің 0–11 сыныптары қашықтан оқытуға ауыстырылды.

Қатонқарағай ауданында ауа температурасы –34…–35 градус болғандықтан, Үшбұлақ бастауыш мектебінің 0–4 сыныптары онлайн форматқа көшірілді.

Марқакөл ауданында ауа температурасы –30 градусқа дейін төмендеуіне байланысты №1 орта мектеп пен мектеп-интернат-колледждің 0–4 сыныптары қашықтан білім алуда.

Самар ауданында –30…–32 градус аязда Мағжан Жұмабаев атындағы негізгі мектептің 0–9 сынып оқушылары дистанциялық форматта оқып жатыр.

Бұған дейін синоптиктер еліміздің шығысында ауа температурасының төмендеуі мен қолайсыз ауа райы жағдайлары туралы ескерткен болатын. Оқушылардың қауіпсіздігін қамтамасыз ету мақсатында қашықтан оқытуға көшіру туралы шешім қабылданды.

Сондай-ақ бүгін Тараз қаласының оқушылары да қашықтан оқытуға ауысты.

Еске салсақ,  Астанада 12 ақпан күні бірінші ауысымның 0-11 (12) сынып оқушылары және колледждердің 1-2 курс студенттері қашықтан оқыту форматына ауысқан болатын. 

Оқи отырыңыз:

• ХОК шеттетілген украиналық скелетоншыға Олимпиадада қалуға рұқсат берді
• Ораза кестесі 2026: Қай уақытта ауыз бекітіп, қай уақытта ауыз ашамыз?
• Тоқаев Ұлттық банк пен Қаржы мониторингі агенттігін қатты сынға алды