240 млн теңгеге жасалған Steppe Rider қазақ тілін үйретіп жарытпады: ҰҚК мен экономикалық тергеу тексеріп жатыр

Ғылым және жоғары білім министрлігі 240 млн теңгеге жуық қаржы жұмсалған «Steppe Rider» бейнеойынын әзірлеуге қатысты тексеру бастады. Бұл туралы бүгін Үкіметтегі брифингте ведомство басшысы Саясат Нұрбек мәлімдеді, деп хабарлайды Orda.kz.       

Министрге ведомство ойынның нәтижесіне көңілі тола ма және дайын өнімнің бастапқы техникалық талаптарға сәйкестігі тексерілді ме деген сұрақ қойылды.

«Осы жағдайға байланысты ҰҚК-нің Сыбайлас жемқорлыққа қарсы қызметіне және Астана қаласы бойынша Экономикалық тергеу департаментіне тексеру жүргізу туралы сұрау жолдадық. Бұл тексеруді өзіміз бастадық», – деп жауап берді Саясат Нұрбек. 

Министрдің айтуынша, қазіргі уақытта тексеру жұмыстары жалғасып жатыр.

«Әрі қарай сот тәртібімен немесе әкімшілік іс жүргізу аясында қандай да бір шешім қабылданатын болар. Бұл тексеру жүргізіп жатқан органдардың құзыретіндегі мәселе. Тиісті сұрауларды өзіміз бастап, жолдадық», – деді ол

Алайда министр ведомствоның ойын әзірлеу нәтижесіне нақты көңілі толған-толмағанын және дайын ойынның техникалық сипаттамада көрсетілген барлық талаптарға сәйкес келген-келмегенін ашық айтпады.

«Steppe Rider» ойыны туралы айта кетсек,  2025 жылдың наурызында Ғылым және жоғары білім министрлігі қазақ тілін үйренуге арналған балалар компьютерлік ойынын әзірлеуге мемлекеттік сатып алу жариялаған.

Жобаға шамамен 242 млн теңге жұмсау жоспарланған. Сол жылдың сәуірінде министрлік «United Kingdom» ЖШС-мен 239,8 млн теңгеге келісімшарт жасасқан. Кейін мердігерге келісімшартта қарастырылған қаражаттың толық көлемі төленген.

Алайда 2025 жылдың желтоқсанында көпшілікке «Steppe Rider» деп аталатын жүгіру жанрындағы ойын ұсынылды. Ойын барысында пайдаланушы үш жолақтың бірінде қозғалып келе жатқан кейіпкерді басқарады. Кейіпкер түрлі кедергілерден өтіп, қазақ тіліндегі сөздерді құрауға қажетті әріптерді жинайды.

Соған қарамастан, бұған дейін Ғылым және жоғары білім министрлігінің Тіл саясаты комитеті дайын ойынның техникалық сипаттама талаптарына сәйкес келетінін мәлімдеген болатын.

Енді ойынның әзірленуіне жұмсалған 239,8 млн теңгенің қаншалықты тиімді игерілгені және дайын өнімнің бастапқы талаптарға сәйкестігіне қатысты мәселені құзырлы органдар тексеріп жатыр.

Қазақ тілін дамыту мен өркендетуге президент Қасым-Жомарт Тоқаевтың өзі үлес қосып жатыр. Оған Euronews Қазақстандағы қатысуын кеңейтіп, қазақ тілінде хабар таратып, жаңа бірлескен жобаларды қарастырып жатқаны дәлел. Бұл мәселені Тоқаевтың өзі Euronews директорлар кеңесінің төрағасы Педро Варгас Давидпен кездесуінде негізгі тақырыпқа айналдырды.

Оқи отырыңыз:

• Тоқаев дипломатиясы: Euronews медиажелісінде Орталық Азия халықтарының ішінде алғашқы болып қазақ тілі қолданысқа енеді
• Канье Уэсттің Алматыдағы концертінде қазақ тілі неге ескерілмеді?
• «Білім саласындағы жанжал»: Нархоз университеті қазақ тілін алып тастады