2025 жылғы MIVD есебі: Әлемде геосаяси қауіп күшейіп келеді

2025 жылға арналған Militaire Inlichtingen- en Veiligheidsdienst (MIVD) ашық жылдық есебі жарияланды, деп хабарлайды Orda.kz. 

Нидерландтың әскери барлау қызметі (Militaire Inlichtingen- en Veiligheidsdienst—MIVD) 2025 жылғы есебінде әлемде ірі державалар арасындағы бәсекелестік күшейіп, халықаралық қауіпсіздік жүйесі әлсіреп бара жатқанын мәлімдеді.

Әскери барлау және қауіпсіздік қызметі (MIVD) саяси, әскери, экономикалық және технологиялық үстемдік үшін бәсекелесіп жатқан ірі державалар Еуропаның қауіпсіздігіне қысым жасап отырғанын атады. Мәселен, Қытай мен Ресей әлемдегі батыс ықпалына қарсы шығып, ауқымды геосаяси мақсаттарды көздейді. Қытай компаниялары Ресейдің Украинадағы соғыс кезіндегі әскери әрекеттеріне қолдау көрсетіп отыр және осы арқылы Еуропа мен НАТО үшін күшейіп келе жатқан қауіптің маңызды бөлігіне айналуда.

Есепте Ресей мен Қытайдың геосаяси ықпалы ерекше атап өтілген. Ресей Украинадағы соғыспен қатар кибершабуылдар, жалған ақпарат тарату және диверсия арқылы Еуропа қауіпсіздігіне тікелей қатер төндіріп отыр. Ал Қытай Тайваньға қатысты саяси ұстанымын күшейтіп, сонымен бірге технологиялық тыңшылық пен кибероперациялар арқылы ықпалын кеңейтуде.

Сонымен қатар Таяу Шығыстағы қақтығыстар, Қызыл теңіздегі шабуылдар және Кариб аймағындағы АҚШ пен Венесуэла арасындағы шиеленіс Нидерланд мүдделеріне қосымша қауіп тудырып отыр.

MIVD мәліметінше, қазіргі әлемде одақтастықтар бұрынғыдай тұрақты емес, ал Еуропа өз қауіпсіздігі үшін көбірек жауапкершілік алуы қажет. 

MIVD соңғы жылдары өзгерген қауіпсіздік жағдайына байланысты 2024–2030 жылдарға арналған жаңа стратегиясын жариялады.

Құжатта ұйымның үш негізгі бағыты көрсетілген. Бірінші — геосаяси өзгерістерге жедел әрекет ету. 

MIVD әлемдегі саяси өзгерістер мен дағдарыстарға тез жауап беріп, белгілі және белгісіз қауіп-қатерлерді алдын ала анықтауға басымдық береді. Бұл үшін халықаралық серіктестермен ынтымақтастық күшейтіліп, жаңа технологиялар арқылы барлау жұмыстары икемді әрі жылдам жүргізіледі. Ал екінші — ашық соғыс емес, жасырын қақтығыс аймағы. 

MIVD бұл жасырын қауіптер аймағында маңызды рөл атқарады. Ұйым Нидерланд пен қорғаныс саласын қорғау үшін арнайы өкілеттіктер мен мүмкіндіктерді қолданады. Сондай-ақ, киберқауіптер мен диверсияға қарсы алдын алу шараларын серіктес ұйымдармен бірге жүзеге асырады.

Үшінші — кең ауқымды соғысқа дайындық. 

MIVD НАТО және Нидерландтың ірі әскери қақтығыстарға тартылуын болдырмау үшін қорғаныс қабілетін күшейтуді көздейді. Ол әскери барлау жүйесін дамытып, операциялық штабтармен тығыз байланыста жұмыс істейді.

MIVD қазіргі қауіпсіздік жағдайы тұрақсыз екенін және барлау қызметінің жылдам, технологиялық әрі алдын ала әрекет етуге бағытталуы қажет екенін айтты.

Оқи отырыңыз: 

• Абай облысында шаруа қожалығының басшысы жоқ малға мемлекеттен 250 млн теңге алған
• Таразда«өзін-өзі тонап», қарақшылық туралы экшн сценарий ойлап тапқан әйелге сот үкімі шықты