«20 млрд шығын»: «Қазатомөнеркәсібінің» үздік менеджері сотталды

Асқар Батырбаев мемлекетке 20,1 млрд теңгеден астам шығын келтірді. Сот оны төрт жарым жылға бас бостандығынан айырып, мүлкін тәркілеп, мемлекеттік марапаттан айырды, деп хабарлайды Orda.kz.

«Қазатомөнеркәсіп» ҰАК” АҚ коммерция жөнінде экс-басшысының ісі Астана сотында қаралды. Ол мемлекетке үлкен зиян келтіру арқылы лауазымдық өкілеттіктерін асыра пайдаланды деп айыпталды.

Тергеу барысында анықталған ақпаратқа зер салсақ, 2021-2022 жылдары Асқар Батырбаев уранды нарықтық бағадан төмен бағамен жеткізуге 13 келісімшарт жасасқан.

«3 келісімшарт мерзімді бұза отырып жасалған. Тағы 10 келісім орташа нарықтан төмен құн бойынша жасалған. Британдық Yellow Cake plc компаниясымен жасалған мәмілелердің бірінде екі миллион фунт уран сату көзделген. Яғни, бір фунтын 32,23 долларға сатқысы келді. Ал оның негізгі бағасы 45,5 доллар. Сот бағалауы бойынша барлық келісімдерден келтірілген залалдың жалпы сомасы 20,1 млрд теңге болады» деп жазылған сот материалында. 

Осы мәмілелер үшін үздік менеджер 54 миллион теңге бонус алған. Ал сотта Батырбаев келісімшарттардың «талаптарын басқарма мен директорлар кеңесі келісіп жасады» деп кінәсін мойындамады. Алайда, сот бұл талаптарға ешқандай дәлел таппады. Өйткені хаттамаларда жеңілдіктерге рұқсат беру туралы нұсқаулар жоқ, ал басшылық отырыстарының бейнежазбаларында баға шарттарын талқылау туралы айтылмаған.

Сот «Самұрық-Қазына» АҚ пайдасына 20,1 млрд теңгеге талап арызды қанағаттандырып, президентке «Ерен еңбегі үшін» медалінен айыру туралы ұсыныс жолдады. Үкім әлі күшіне енген жоқ.

Еске сала кетейік, бұған дейін полицияның «Антикор төрағасын» ұстағаны туралы хабарлаған болатынбыз.