«2 млрд теңге жымқырған»: Денсаулық сақтау басқармасының экс-басшысы мен әріптестері ұсталды

Қостанай облыстық денсаулық сақтау басқармасының бұрынғы басшысы мен оның әріптестері ірі көлемде бюджет қаржысын жымқырды деген күдікке ілінді. Бұл туралы прокуратура мәлімдеді, деп хабарлайды Orda.kz. 

Тергеу мәліметінше, ауруханаларға қажет емес медициналық жабдықтар бірнеше есе қымбат бағада жеткізілген. Осы арқылы мемлекетке келтірілген залал көлемі 2 миллиард теңгеден асты.

Аталған іс бойынша экс-басшы Данияр Жандаев, оның орынбасары Ерболат Доспанов, бір аудандық аурухананың бас дәрігері және жабдықтарды жеткізуші компания өкілі ұсталды. Қай аудан туралы сөз болып отырғаны әзірге нақты айтылмады.

Бұл жағдайға қатысты облыс әкімі Құмар Ақсақалов та пікір білдірді. Ол күдіктілердің ұсталғанын растағанымен, тергеу жұмысына араласпайтынын айтты.

Ақсақалов сонымен қатар денсаулық сақтау жүйесіндегі сатып алу процесін бақылауды күшейту қажет екенін мойындады.

Іс бойынша тергеу жалғасып жатыр. Құқық қорғау органдары барлық күдіктілерге қатысты нақты шешімді тергеу нәтижесі бойынша шығарады.

Айта кетейік, Ақтөбе облысы Темір ауданы Темір қаласының әкімі Еркін Далмағамбетов өзіне қол жұмсады. 46 жастағы шенеуніктің денесі өз үйінен табылды.