Ақтөбе облысында қала әкімі суицид жасады

Ақтөбе облысы Темір ауданы Темір қаласының әкімі Еркін Далмағамбетов өзіне қол жұмсады. 46 жастағы шенеуніктің денесі өз үйінен табылды, деп хабарлады Orda.kz жергілікті тілшісі.

Жағдай 20 желтоқсан күні сағат 21:00 шамасында болды. Бейресми дерекке сүйенсек, сол күні жолдастарымен кездескен. Қайғылы хабарды аудан әкімдігі растады. 

«Оқиға бар. Денесі өз үйінен табылды. Қазіргі таңда жан-жақты қаралып, тергеу жүріп жатыр. Балалары бар», – деді Темір ауданы әкімі Алмас Жақсылықов. 

Еркін Далмағамбетовтың артында екі әйелінен 6 баласы қалды.

«Өз-өзіне қол жұмсау фактісі бойынша полиция сотқа дейінгі тергеп-тексеру жұмыстарын бастады. Оқиғаның мән-жайы анықталуда. ҚР ҚПК-нің 201-бабына сәйкес өзге ақпарат жариялауға жатпайды», – деп хабарлады Ақтөбе облысы ПД-нің баспасөз қызметі.

Далмағамбетов 2024 жылдың 3 маусымында бастап Темір қаласының әкімі болып сайланған. Еңбек жолын 2001 жылы бастаған. Әр жылдары жер қатынастары саласында түрлі лауазымдар атқарып, жеке секторда істеген.

Айта кетейік, осыған дейін Ақтөбе облысы Алға ауданында Бестамақ ауылының әкімі Қанат Дәулеталин өзіне қол жұмсамақ болды. 

Автор: Ардақ Ерубаева