19 жастағы Жасұлан Әбдіманапты өлтіргендердің апелляциялық шағымы қаралды

Әскери соттың апелляциялық алқасы 19 жастағы Жасұлан Әбдіманапты өлтіргені үшін сотталған адамдардың шағымдарын қарады, деп хабарлайды Orda.kz.

Түркістан облысында осы жылдың ақпанында Жасұлан Әбдіманапты 14 жерінен пышақтап өлтірген ефрейтор Мурод Әбдіжәмілов 15 жылға бас бостандығынан айырылды. Оның сыбайласы Диас Ибрагимов пен Адина Мамаева ауыр қылмыс жасағаны үшін сотталды. Ибрагимов екі жыл сегіз ай, ал Мамаева төрт жылға бостандығынан айырылған еді.

Жәбірленуші тараптың адвокаты Нұртуған Өмірзақ алдын ала сөз байласу арқылы топтасып жасаған қасақана кісі өлтіру ісін қайта саралауды, моральдық зиян сомасын ұлғайтуды сұрады.

Сотталғандардың адвокаттары олардың кінәсі дәлелденбегенін және тек жанама дәлелдер келтірілгенін айтып, істі тоқтатуды талап етті.

Айта кетейік, сотталғандардың Жасұлан Әбдіманапты өлтіруіне марқұмның атына алған несиелері себеп болған. Мурод Әбдіжәмілов мүгедек жігітті өлтіріп, денесін айдалаға алып барып тастаған.