«13 млн теңге несие ал!» Алаяқтардың айтқанын орындап, полицияға да, ұлына да сенбеген

Алматы облысында полиция кезекті интернет-алаяқтықтың жолын кесті. Күдікті белсенділік туралы ақпарат «Қазақтелеком» АҚ-мен бірлесіп әзірленген жүйе арқылы түскен, деп хабарлайды Orda.kz.

Алматы облысы ПД киберқылмысқа қарсы іс-қимыл басқармасы қызметкерлері бірден ықтимал жәбірленушінің жұмыс орнына барған. Алаяқтардың сөзіне сенген ер адам олардың барлық нұсқауын орындаған.

Қаскөйлер оны айналасындағылардан оқшаулануға, жақындары мен полиция қызметкерлерінің қоңырауларына жауап бермеуге және бірнеше банктен несие рәсімдеуге көндірген. Осылайша ер адам алаяқтардың тұрақты психологиялық қысымында болған.

Полиция қызметкерлері ер адаммен байланысуға тырысқанымен, ол тіпті отбасы мүшелерінің қоңырауларына да жауап бермеген. Осыдан кейін киберполиция оның жұбайы мен балаларын тауып, жағдайды түсіндірді.

Туыстарына банктерге дереу хабарласып, несие рәсімдеуге жасалған ықтимал әрекет туралы ескерту ұсынылды. Нәтижесінде банктер несие беруден бас тартып, ірі көлемдегі қаржылық шығынның алдын алды.

Ер адамды полиция қызметкерлері өндірістік база аумағынан тапқан. Оған жағдайды бірнеше рет түсіндіруге тырысқанымен, ол белгісіз адамдарға сенуін жалғастырған. Бастапқыда полиция қызметкерлеріне, тіпті өз ұлына да сенбеген.

Тек ер адамның 13 млн теңгеден астам несие рәсімдеп, бұл қаражатты алаяқтарға беруге шақ қалғанын түсінгеннен кейін ғана жағдайдың қаншалықты маңызды екенін ұққан.

Полицияның мәліметінше, бұл жағдай қаскөйлердің құрбандарына қаншалықты күшті психологиялық ықпал ете алатынын көрсетеді. Олар азаматтарды жақындары мен құқық қорғау органдарынан оқшаулап, өз нұсқауларын орындауға мәжбүрлейді.

Полиция күдікті қоңырауларды жедел анықтау қылмысқа дер кезінде араласып, оның алдын алуға мүмкіндік беретінін атап өтті.

Тек бір тәуліктің ішінде Алматы облысында аталған жүйенің көмегімен интернет-алаяқтықтың 13 дерегінің жолы кесілді.

Оқи отырыңыз: 

• Құрылтайда сегіз тұрақты комитет құрылып, төрағалары сайланды
• Құрылтай төрағасының орынбасарлары сайланды