Әзірбайжан Қарабақ келісімінің бұзылғанын  жоққа шығарды

Әзірбайжан Ресей Қорғаныс министрлігінің Қарабақ бойынша келісімдердің бұзылғаны туралы мәлімдемесін жоққа шығарады.

РФ Қорғаныс министрлігі «Әзірбайжан әскерилері Қарабақ бойынша үшжақты келісімдерді бұзып, ресейлік бітімгершілік күштерінің жауапкершілік аймағына кіріп, Қарабақ армиясының бөлімшелеріне түрік ұшқышсыз ұшақтарынан оқ жаудырды» деп мәлімдеді.

 Баку бұл айыптауларды жоққа шығарып, Әзірбайжан тарапынан ешқандай заң бұзушылық болмағанын айтады.

«Әзірбайжан 2020 жылғы 10 қарашадағы үшжақты мәлімдеменің бірде-бір пунктін бұзған жоқ. Керісінше, осы мәлімдеменің 4-тармағына сәйкес, Армения армиясының және басқа да заңсыз армян қарулы құрылымдарының қалдықтары Әзірбайжанның Қарабақ аймағынан әлі шығарылмағанын өкінішпен мәлімдейміз. Демек, мәлімдеменің тармақтарын Әзірбайжан емес, Армения бұзып отыр»  делінген Әзірбайжан әскери ведомствосының мәлімдемесінде.

Әзірбайжан Қорғаныс министрлігі ресейлік тарапты «Әзірбайжан қарулы күштерінің біздің елдің егеменді аумақтары шегінде қозғалысы туралы мәліметтерді бұрмаламауға» және «Таулы Қарабақ» терминін қолданбауға шақырды.

Республиканың әскери ведомствосы «Ресей Қорғаныс министрлігінің 2022 жылғы 26 наурыздағы біржақты және шындыққа сәйкес келмейтін мәлімдемесіне» өкініш білдірді.

Баку 25 наурызда Әзірбайжан мен Ресей қорғаныс министрлері Закир Гасанов пен Сергей Шойгудың телефон арқылы сөйлесуінде Қарабақтағы жағдайдың талқыланғанын қосты.

«Әңгімелесу барысында Әзірбайжан тарабы бақылау-өткізу бекеттерінде позициялар мен орындар нақтыланып жатқанын мәлімдеді. Осыған қарамастан, 26 наурыз күні таңертең  армян қарулы жасақтарының мүшелері Әзірбайжан армиясының бөлімшелеріне заңсыз шабуыл жасамақ болды. Шұғыл шаралардың нәтижесінде  армян қарулы жасақтарының мүшелері шегінуге мәжбүр болды»  деп атап өтті әскери ведомство.

Арменияның сыртқы істер министрлігі кеше Әзірбайжан қарулы күштері Ресей бітімгершілік миссиясының жауапты аймағындағы Таулы Қарабақтағы түйіспе сызығын бұзып, СҚО Әскеран ауданындағы Парух ауылын басып алғанын хабарлады.

Әзірбайжан Қорғаныс министрлігі ресейлік бітімгершілік контингентінің орналастырылған аймағында қарулы оқиға болғаны туралы ақпаратты жоққа шығарды. Қорғаныс министрлігі Әзірбайжан армиясының бөлімшелері күш қолданбай позициялар мен орналастыру нүктелерін нақтылау үдерісін жалғастырып жатқанын мәлімдеді.

Танылмаған Таулы Қарабақ Республикасында әскери жағдай енгізілді.