Зілзала тіркелді: Алматы тұрғындарына жер сілкінісі туралы хабарлама жіберілді

Алматы қаласының тұрғындары ұялы телефондарына жер сілкінісі туралы хабарлама алғанын хабарлады, деп жазады Orda.kz.

Алайда қалада дабыл сиреналары қосылған жоқ.

Қалалық төтенше жағдайлар департаменті тұрғындарды сабыр сақтауға шақырып, «сейсмологтардан ақпарат түскен жоқ» деп мәлімдеді.

21 қыркүйек күні сағат 16:25-те ТЖМ сейсмикалық станциялары Алматыдан оңтүстік-батысқа қарай 9 шақырым жерде жер сілкінісін тіркеді. Магнитудасы 3,8, энергетикалық класы – 7,2. Мамандардың есебі бойынша, бұл жер сілкінісі сезілмейтін деңгейде болған. Алматыда да ешкім дүмпуді байқамады.

Алматы қаласы ТЖД түсініктеме беріп, 21 қыркүйек күні сағат 16:20-да жоспарлы тоқсан сайынғы техникалық тексеріс жүргізгенін хабарлады.

«Бұл оқу-жаттығу жүйені тексеруге арналған. Ол «Барлығына назар аударыңыз!» деген бірыңғай дабыл сигналын беру арқылы жүзеге асырылады. Тексеру барысында электрлі сиреналар қосылады, теледидар мен радио арналары автоматты түрде үзіледі және халыққа жүйенің дайындығын тексеру туралы хабарлама беріледі», – деп түсіндірді ведомство.

Сондай-ақ, ТЖД жүйенің қалай іске қосылғанын түсіндірді.

«Mass Alert хабарлау жүйесі сейсмологтардың датчиктері іске қосылғаннан кейін автоматты түрде жұмыс істей бастады. Сабыр сақтауды сұраймыз! Қауіп жоқ. Нақты ақпарат қосымша хабарланады», – деп мәлімдеді департамент.