«Жүргізушінің жағдайы белгісіз»: 2 тонналық жүк көлігі шұңқырға түсіп кетті

Жапонияда 2 тонналық жүк көлігі шұңқырға түсіп кетті. Көлік жүргізушісінің жағдайы белгісіз. Құтқарушылар үшінші күн қатарынан құтқару жұмыстарын жүргізіп жатыр, деп хабарлайды Orda.kz. 

Ясииро қаласында аяқ астынан алып шұңқыр пайда болды. Ол шұңқырға 74 жастағы жүргізуші жүк көлігімен түсіп кетті. Кеше, 29 қаңтар күні таңертең құтқару жұмыстары жүргізіліп жатқан кезде шұңқыр тағы опырылды. Ол жерден құтқарушылар әрең қашып құтылды. 

Алдын ала мәліметтерге сүйенсек, шұңқыр кәріз құбырының жарылуынан пайда болған. Сондықтан ағынды су айналасындағы топырақты шайып кетіп, құтқарушыларға қауіп төндіріп жатыр. Әрі шұңқырға су тола бастапты. 

Әзірге жүргізушіден хабар жоқ. Бастапқыда ол төтенше жағдайлар қызметімен байланысқан, кейіннен байланыс үзіліпті. Ер адамның денсаулығы туралы ешкім ештеңе білмейді.

Билік шұңқырдағы суды азайту үшін ағынды суларды жақын маңдағы өзенге ағызды. Сонымен қатар көрші қалалардағы 1,2 миллионнан астам тұрғыннан суды көп пайдаланбау сұралды.