«Жүрегі жарылды»: Түркістанда құрдастары 9-сынып оқушысын моланың қасында сабап өлтірді

Түркістанда 9-сынып оқушысына құрдастары әлімжеттік көрсетіп, моланың басына апарып жүрек тұсынан жұдырықпен ұрып өлтірді, деп хабарлайды Orda.kz.

9-сынып оқушысы Мейіржан Нұржанұлын кешке қарай достары үйінен шақырып алып кеткен. Артынша, баланың суыған денесі моланың басынан табылған.

Немересінен айырылып, қайғыдан қан жұтып отырған Несіпгүл Тұтқабекова марқұмды аса қатты жауыздықпен өлтіргенін айтты.

«Бұлар балаларды жинап,  шеттерінен ұрып шыққан. Екі соққыдан есептегенде 8 соққы жасаған. Менің інімнің жүрегінен ұра берген. Жүрегінен ұра берген соң сол жерде жүрегі тоқтап қалып, жарылып кеткен. Ұйқы безі езіліп, жарылып кеткен. Сол жерде тіл тартпай кеткен. Бұлар маған алдап: «талып қалды» деп айтып тұр. Мен тездетіп жетсем,  40 минут бұрын жүріп кеткен екен інім», – дейді марқұмның ағасы Бауыржан Нұржанұлы.

Марқұм Мейіржан үйіндегі үш баланың кенжесі. Әкесінен сәби кезінде айырылған бала мектепте озат оқушы болыпты. Тіпті ажалының алдында байқау жеңімпазы атанған. 

«Әлімжеттік көрсеткен жігіттер:  «Бүгін сағат пәлен уақытта 15 мың немесе 20 мың жинаңдар» дейді екен. Жағдай енді әр түрлі ғой. Біреуде бар, біреуде жоқ. Сол бір бала әкелмесе бәрін ұрып шығады екен. Осыдан 10 күн бұрын шай ішіп отырсақ мына жері көкпеңбек «жай, әшейін ұрып алдым» дейді. Менің баламды қорқытып жүргеніне 3-4 ай болыпты», – дейді Мейіржанның әжесі.

Марқұмның отбасы қаскөйлік әрекет жасаған жасөспірімдер жазасыз шығып кетеді деп қорқады. Сондықтан олар тергеудің әділ болғанын және күдіктілердің қамауға алынуын талап етіп отыр.

«Қылмыстық іс тіркелді. Сол себепті жаңа мәлімет тарата алмаймыз», – деді бала құқықтары жөніндегі уәкіл Динара Зәкиева.

Мейіржанның жақындарының айтуынша, оған әлімжеттік көрсеткендердің барлығы әртүрлі мектепте оқиды. Тіпті олардың қатарында оның сыныптасы да бар. Ал білім ордасы бұл жайтқа қатысты пікір білдіруден бас тартты.