Жылыой ауданында 100-ден астам отбасы бүлінген жылжымайтын мүліктерін бағалау қорытындысын алды

Құлсары қаласындағы су тасқынынан зардап шеккен үйлерге келтірілген залалды бағалау және техникалық сараптама нәтижелерін түсіндіру бойынша мобильді топтар жұмысының бірінші күні аяқталды, деп хабарлайды Orda.kz порталы.

«Алты мобильді топ Құлсары қаласының 100-ден астам тұрғынының үйіне барып, келтірілген шығынды анықтау және техникалық сараптама қорытындысы бойынша түсіндіру жұмыстарын жүргізді. Екі күннен кейін бағалау комиссиясының шешімімен келіскен Құлсары тұрғындары мемлекеттен көмек алу үшін Жылыой ауданы әкімдігіне хабарласа алады» деп хабарлады Атырау облысының төтенше жағдайлар жөніндегі штабы. 

Келтірілген шығынды бағалау қорытындысы жарияланғаннан кейін Жылыой ауданының әкімдігі екі бағытта жұмыс істейтін болады. Үйлерді жөндеу қажет болса, жөндеу жұмыстарына және бүлінген мүліктің орнын толтыруға қаражат төленеді. Үйлер қауіпті деп танылса, мемлекет есебінен жаңа үй салынады.