Жылу электр станцияларына қадағалау күшейтіледі

Республиканың кейбір ЖЭО-лары жекенің қолында болғандықтан, олардың қызметіне бақылау орнату өте қиын.

Атап айтқанда, инвестициялық бағдарламаларға байланысты жөндеу жұмыстарының уақытылы жүргізіліп, қажетті құрал-жабдықтардың сатып алынуын қадағалай алмайды. Бұл тақырыпқа Энергетика министрі Алмасадам Сәтқалиев Шығыс Қазақстан облысына жұмыс сапары барысында тоқталды.

Мысал ретінде, «Риддер ЖЭО» АҚ-ның бұрынғы иелері күрделі жөндеу жұмыстарын жүргізбеген, салдарынан өткен жылу беру маусымында станциядағы қазандық қондырғылары бірінен соң бірі істен шықты, қала дұрыс жылытылмады.

Қазір Риддер ЖЭО-ның бұрынғы жұмысшыларының үстінен күрделі жөндеуге арналған қаражатты жымқыру фактісі бойынша қылмыстық іс қозғалды. Бұл еліміздің энергетикалық нысандарындағы жеке кәсіпкерлердің сәтсіз жұмысының тағы бір мысалы. Енді, Энергетика министрлігі басшысының айтуынша, Қазақстанда жеке меншіктегі жылу электр станцияларына энергетикалық қадағалау күшейтілмек.

«Үкімет деңгейінде бізге энергетикалық қадағалауды күшейту бойынша қолдау көрсетілді, яғни бұрын энергетикалық қадағалаудың нысанға кіруге құқығы да болған жоқ. Жоспарланған тексеруді үйлестіру үшін тиісті рұқсат алу керек болды. Қазір заңнамаға өзгертулер енгізіп жатырмыз, бұйрықпен барлық инспекторларға негізгі электр жабдықтарын ғана емес, күрделі және ағымдағы жөндеуге байланысты нысандарды тексеруді қамтамасыз етеміз», - деді Сәтқалиев.

Ол сондай-ақ, жұртшылық арасынан ынталы топ құрылғанын, қазір олар Риддер әкімдігі өкілдерімен бірге жергілікті жылу электр орталығындағы күрделі жөндеу жұмыстарын бақылап отырғанын айтты.

Әр мердігерге жұмыстың қалай жүріп жатқанын, кестеден артта қалудың бар-жоғын қадағалап отыру үшін қалалық мәслихат депутаты бекітілді. Энергетика министрлігі басшысының айтуынша, бұл тәжірибе республика бойынша қабылданып, іске асады.